India nung tanur merenshiba rongnung Mizoram nung timba lir

Aizawl, February 26 (Agencies): 2012 küm January ita nungi 2017 küm January ita tashi nung Mizoram nung tanur dak tim mesüi kongshiba ken o 568 lir aser India nung tanur merenshiba rongnung Mizoram ya temaba jenjang nung lir.
Tanurtem merenshiba aser mapa tamajung inyaktsü merangba nungi kümzüktsü asoshi sentong ka Aizawl nung taoba Brehostibar anogo nungi tenzüka agiba mapang iba osang ya metetdaktsü.
Mizoram nung 2012 küm nungi tenzüka tanurtem dak tim mesüi kongshia merenshiba ken o timba akümer. State nung tanurtem ya kechalena kümzüka mali, kechiyong parnok dak iba amala mapa tamajung ya kinunger, medemer aser tesayurtemi inyaker, ta osang agütsü.
Child Welfare Committee (CWC) ajanga osang agütsüba nung Mizoram nung tanurtem dak tashiyim agi mapa tamajung inyakba ken o ya 2012-13 nung 62 liasü aser 2013-14 nung 41 liasü. Iba amala ken o ya 2014-15 nung 136 liasü. 2016 nungi 2017 küm January ita tashi nung tanurtem dak tashiyim agi mapa tamajung inyakba ken o 147 lir.
State nung tanurtem dak tashiyim agi mapa tamajung inyakba aser merenshiba nungi kümzüktsü asoshi sentong ya Aizawl District Child Protection Unit, World Vision, SCERT aser Mizoram Primary School Teachers Association ajanga ayongzüka agi.
Iba sentong nung Mizoram Parliamentary Secretary, Education, Joseph Lalhlimpuia tongti tesemdanger asü.
Mizoram nung 2012 küm nungi tenzüka tanurtem merenshiba aser tanurtem dak tashiyim agi mapa tamajung inyakba ken o timba akümba asoshi kanga sasa jembi.