India nung tanur million 2.9 nem measles vaccine magütsü: UNICEF

New Delhi, April 26 (Agencies): India nung Immunisation agi ayimjemba shilem 80 dak tema süaka India nung 2010 küm nungi 2017 küm tsüngda tanur million 2.9 nem measles vaccine mezüngbuba shilem magütsü, ta UNICEF-i metetdaktsü.
Küm shia tanur timtiba asoba linükji India (kümshia tanur million 25) lir, iba sülen Pakistan aser Indonesia na (million 1.2) aser Ethiopia (million 1.1) lir; middle-income linüktem nung iba vaccine agütsütsüji kanga tongtibang, ta UNICEF-isa metetdaksü.
2017 küm measeles vaccine mezüngbuba shilem magir arishi küm ka tekübokpur timtibaji Nigeria linük liasü (tanur million 4), ta parnokisa metetdaktsü.
Ano high-income linüktem rongnung 2010 küm nungi 2017 küm tsüngda tanur nem measles vaccine mezüngbuba shilem magütsüba linüktem rongnung temaba jenajng nung United States (million 2.5 nem vaccine magütsü) lir,” ta parnokisa metetdaktsü. Iba sülen France (lakh 6) aser United Kingdom (lakh 5) linük na lir.
2010-2017 kümtem nung alima nung measles vaccine mezüngbuba shilem magir kinü tanur million 169 shi liasü, ta UNICEF-i metetdaktsü.
Item kuli ajanga alima tesem ajungalen measles wara poktettsü, ta parnoki metetdaktsüogo.
UNICEF Executive Director, Henrietta Fore-i, “Measles virus yagi teti agia vaccine magiba tanurtem kongshir. Lendong aketba tashidak ya nokdangtettsü, anungji asenoki iba tashidak nokdangtsü atema bilemra asenoki takar aser sensaker linük ajak nung tanur shia nem iba vaccine agütsütsüla,” ta metetdaktsü.