India nung tanur shilem 50-i online nung ajurur dak tamang akar

New Delhi, October 27 (Agencies): India nung tanur noklang nung shilem 50 dak temai online nung ajuruba nisungtem ajuruba aser ajurunüa bilemba US nung aliba Intel Security Group-i bushisüngdang tasen ka agiba mapang nungetogo.

Iba bushisüngdang ya Teens, Tweens aser Technology Survey telemsa nung agia liasü aser iba ya ajanga arishi küm 8 nungi 16 tsüngda alirtemi social network amshiba yimya tendanga liasü.

Kasa bushisüngdang nung tsürabur tebilemba dena bushidanga liasü aser iba mapang tsürabur noklang nung shilem 48-i pei tanur online nung kodanga mongu dangba aser memetetba nisungtem den metettepbaji ajak dang tamajungba ta ashi.

“Ibai tebilemtsü tulu lir, kechiba süra tanur noklang nung shilem 44-ibo online nung medemertem den ajuruteptsü jangra mesüra ajuruteper,” ta parnoki ashi.

“Tesüiba mapa ama onoki Teens, Tweens aser Technology survey tem taküma agiogo aser iba mapang ngutetbatem ajanga tebilemtsü tulu temai adoka sayuogo,” ta Intel Security nung Asia Pacific consumer marketing director, Melanie Duca-i ashi.

“Akhi telemen sensaktem dak alia parnoki mejembitsü o jembia sensak asemer. Anungji tanurtem nem ibaji bendanga angatetdaktsütsüji kanga nüngdaka kümogo, kechiba süra ibaji ajanga lendongi aitsü mesüra mak asütsü ana nung lir,” ta Melanie-i ashi.

Taoksatsü ka tsürabur rongnung noklang nung shilem 17-ibo pei tanur online nung memetetba nisungtem den sensak asemba metettsü mejangrar, ta bushisüngdang ajangasa nguteta lir.

Tsüraburtemi pei tanur online ajanga memetetba nisung den sensak asembaji lendonga ta meteta lir, ajisüaka parnok iba talenba nungi anitettsü memeranger, ta bushisüngdangertemi ashi.