India nung tasüba timbaka moko anemba ajanga lir

London, August 22 (Agencies): Alima nung nisung million ka shilem pezü küma lemdangba nung shilem kabo mokozü madoki achiba moko (smokeless tobacco, (SLT) ajanga asür, ta alima nung mokozü madoki achiba moko achirtem asadangertemi bushisüngdang ka ajanga ngutetogo.
Iba rongnunga tasürtemji India nungi timba lir. Küm nung iba moko achiba ajanga India nung nisung million ka agi shilem pezü küma lemdangba nung shilem ka dak tema asür.
Tasüba dang masü saka ano akümlir-a aika moko mejakba ajanga temang nung timtem tulu adoker taküm samatsü tia nung lir, ta bushisüngdang ajanga nguteta liasü.
“South-East Asia nung iba tebilemtsü ya noklang nung shilem 85 tashi smokeless tobacco (SLT) ajanga adokdaktsür aser iba shilem nung shilem 74 bo India nungi aser shilem pongu Bangaladesh nungi lir,” ta kasa bushisüngdang ajanga metetdaktsüogo.
Bushisüngdangertemi, iba data ya linük 113 nungi aser 2010 küm ‘Global Burden of Disease Study & surveys’ ajanga ‘Global Adult Tobacco Survey’ agiba nungi bendena asadanger ngutetba lir.
SLT ajanga 2010 küm kija nisung 62,000 tashi tebang aser trok cancer agi süogo, iba den külemi nisung 200,000 tashi temulungjang tashidak agi süogo, ta bushisüngdang ajanga nguteta liasü.
“Iba tongutetba ya kanga ajemer agütsürba lir anungji tarutsü nungbo tan sayuba dang nungi timba sayutsü akok,” ta University of York, England nung epidemiology & public health nung lecturer Kamran Siddiqi-i ashi.
“Tang tashi nung cigarette nokdangba ama SLT nokdangtsü atemabo international policy kecha yanglua mali. SLT nokdangtsü asoshi linük ajak senteper inyaktsüla,” ta Siddiqi-i tuteta ashi.
Iba tongutetba ya ‘BMC Medicine’ kaket nung adoktsüogo.