India nung temerüktiba yimtitemji Indore, Bhopal aser Chandigarh lir

New Delhi, Monupii/May 16 (Agencies): Taküm agi küm anabuba India nung temerüktiba yimtitem mezüngbuba jenjang ana nung Indore aser Bhopal na lir, aser tasembuba jenjang nung Chandigarh lir.
Tanü Housing & Urban Affairs Minister, Hardeep Singh Puri-i merükmejuba survey agiba osang sangdong liasü.
Iba survey nung yimti 430 dang asadanga liasü.
Ano municipal bodies rongnung temerüktiba yimtiji New Delhi Municipal Council (NDMC) lir aser state yimtibatem rongnung temerüktiba yimtiji Greater Mumbai lir, ta kasa sangdong nung shia lir.
Survey ajanga ashiba agi, tajungtiba inyakba state ji Jharkhand lir, iba sülen tanabuba aser tasembuba jenjang nung Maharashtra aser Chhattisgarh state na lir.
Iba survey agiba nükjidong ya, linük tesem ajaklen merükmeju jenjang tajungba akumtsü atema lir.
Survey osang ajanga ashiba agi, nisung million ka dak tema aliba yimtitem rongnung Vijayawada yimti temerüktiba lir aser nisung lakh asem nungi million ka tashi aliba yimtitem rongnung Mysuru yimti temerüktiba lir.
Sorkari ashiba agi, Swachh Survekshan survey agiba mapang nung linük senso lakh 37.66-i telangzüba agüja liasü, aser iba survey ajanga linük nung municipal tesem 4,203 ayimjema liasü.
2017 küm nungbo merükmeju jenjang nung nisung lakh ka dak tema aliba municipal tesem 434 dang ayimjema liasü.
“Swachh Survekshan survey ji independent agency kati ketdangsüa agi aser yimtitem tarensen atema data ji lenmang asem- service level terenlok; tesem balala semdanga asadangba aser sensotemi telangzüba agütsüba nungi asadanga liasü,” ta ketdangser kati metetdaktsü.
Item nungjagi points shilem 35 bo sensotemi telangzüba agutsüba nungi asadang.
Ano tanga lenla balala nung asadangba rongnung ‘fastest mover’ city ji Ghaziabad; ‘innovation and best practices’ nung yimti tajungtibaji Nagpur, ‘solid waste management’ nung yimti tajungtibaji Navi Mumbai, ‘citizens feedback’ nung yimti tajungtibaji Kota aser ‘Citizens Feedback’ category nung yimti tajungtiba Narharpur liasü.