India nung tzünglu dak sendakba lendong nung asür 134 jungogo

New Delhi, September 30 (Agencies): Tesüiba anogo ishika tzünglu maneni aruba ajanga Hombarnüa Bihar aser Uttar Pradesh state nung tesem aika nung tzü metsünga liasü aser linük tesem balala nung tzünglu dak sendakba lendong balala nung asür 134 jungogo.
Weather department-i tzüngluruwa mongpu menoa alitsü aser Bihar yimtiba Patna nung maneni tzünglu arutsü, ta sangdongogo.
Bihar disaster management department-i ashiba agi, state sorkari Indian Air Force (IAF) dang tzümetsüng aliba tesemtem nung chiyungtsü den relief oset balala agütsütsü atema helicopter ka agüjang, ta mepishiogo.
Uttar Pradesh nunga Ganga ayong anasa aliba Ballia district jail nung tzü tali metsüngba agi ketdangsertemi yangji puoka alir nisung 900 tanga jails nung puokogo.
Brihostibar nungi tenzüka tang tashi nung Uttar Pradesh nung tzünglu dak sendakba lendong balala nung nisung 93 tashi süogo.
Jharkhand nunga tzünglu aruba ajanga Dumka district nung jara ka chirepba lendong nung kibong ka nungi züngsem asem asü.
Iba dak alia Honibarnü Uttarakhand, Madhya Pradesh aser Rajasthan nunga nisung 13 asü aser Gujarat kübok Rajkot district nung gari ka tzü agi ponger aoba lendong nung yangji mena alir tetsür asem arakseta süogo.
Bihar nunga Gaya district nung nisung trok süogo, parnok rongnung nisung pongu jara chirepba lendong nung asü aser kabo tzü agi ponger ao.