India nung UC Browser jenjang tasembuba nung lir

New Delhi, December 5 (Agencies): Facebook aser WhatsApp sülenbo UC browser ya India nung nisung timtibai amshiba internet browser rongnung tasembuba jenjang nung lir, ta osang tasen ka ajanga metetdaktsüogo.
Mobile advertise asüba company, Quettra-i “What Makes Indians Tick” omen nung ajemdaker mobile apps tem market nung koma amshiteper, ibaji asadangba sülen gondha shia apps balala amshiba nung ajemdaker iba osang agütsü.
Ita nung India nungeri Chrome dang nungia UC browser gondha million pongu agi timba amshir.
Gondha sasep nung amshiba dak ajemdaker asadangba nung UC Browser-i Google-a ajatetogo.
UC Browser dang masü saka UC Browser Mini aser UC Browser HD na ya India nung aliba app tajungtiba trok rongnung densema lir, ta kasa osang ajanga ashi.
India aser US nung Android kiburtemi ashiba agi, India nung utility apps, mobile web aser shopping apps timba amshir.
UC Browser ya alima rangben nung ‘third party’ mobile browser rongnung temaba jenjang nung lir aser market shilem nung noklang nung shilem 16 ia lir, ta nija company StatCounter ajanga asadangtetba osang metetdaktsü.
2015 October ita UC browser-i India nung ‘mobile browsing market’ nung shilem tesadang dak tema (54.42%) agia lir aser Indonesia nunga kasa ita nung shilem 49.05% agia lir, ta StatCounter company-isa ashi.
India aser Indonesia naprong mobile internet atema tesem tajung ka ka kümogo.
UC Browser ya kanga tekara aser pei aliba tesem indang kechisarena mela mela reprangtetba ajanga nüngtugu aküm.
UCWeb Inc. ya Alibaba Group mobile business indang telen lir.