India nung yi khenyongi nokdangtsü CPI-i akhanger

Coimbatore, August 02 (Agencies): Yi nokdangba onük nung August 4, 2015 nü yimtenren party kari Tamil Nadu mokdangtsü ayongzüka lir aser CPI-ia ibaji pusemogo; maneni tanü CPI-i, linük ajunga nung yi nokdangtsüla, aser iba dak sendakba nung ozüng ka latettsüla, ta khangogo.
“Tamil Nadu nungi Union Minister Pon Radhakrishnan aser state nung BJP lenirtemi Ato kilonser Narendra Modi dang India nung yi khenyongi nokdangang ta ashitsüla,” ta CPI lenir D Pandian-i Coimbatore nung osangbenertem dang ashi.
Ozüng ka ajanga Centre-i nokdangtettsü aser iba atema NDA sokari mera agia inyaktsüla,” ta pai ashi.
State-i ketdangsüa yi ayokba anema lungkak aitba mapang lungkak aiter Gandhian züngsem, Sasi Perumal asüba ken oji judicial-i bushisüngdangtsüla ta yashi DMK aser PMK-i takhangba agütsüogo, aser Vaiko-i aniba MDMK densema tanga party temi August 4 nü state mokdangtsü ayongzüka lir.
Küm aika arishi küm 59 Perumal-i Tamil Nadu nung yi nokdangtsü asoshi takhangba agüja arur aser Hokolbar nü pa Kanyakumari district nung aliba mobile tongshi kati tua takhangba agüja liasü.
Ghonda pongu dak tema lungkak aitba mapang pa süchia ao, iba sülen pa mozükidangi anir aoba mapang lenmang tom nung asü.
MDMK, Viduthalai Chiruthaigal Katchi aser Manithaneya Makkal Katchi nungeri yi anema August 4 nü state mokdangtsü ayongogo, aser iba mokdang ayongzükbaji BJP, CPI-M aser CPI party temia pusemogo.
Land acquisition bill dak sentakba nung Pandian-i, CPI-i sangdonga aliba ama zonal centre pongu- Chennai, Coimbatore, Madurai, Thanjavur aser Tirunelveli nung August 13 nü lungkak aittsü, ta metetdaktsü.