India nung yimti 75 nung Swachh Bharat asadangtsü

New Delhi, January 9 (Agencies) : Union Ministry of Urban Development-i linük nung Swachh Bharat maparen inyaka aruba asadangba mapa tenzükogo aser yimti 75 nung merükmeju aser metsümeshiba inyakyim reprangdangtsü.
Iba mapa ya Swachh Survekshan ta ajar aser Quality Council of India (QCI) ajanga inyaktsü. Iba mapa kübok state yimtiba ajak aser tanga yimti 53 adentsü aser January 5 nungi 20 tashi asadangba mapa inyaktsü.
Iba bushitetba osangji January 25, 2016 nü MyGov website nung metetdaktsütsü imlar.
“October 2014 nung Swachh Bharat Mission tenzükba sülen Ministry of Urban Development-i mezüngbuba asadangba mapaji Swachh Survekshan ya lir. Ministry-i küm nungi küm iba mapa inyakba metetnür” ta Praveen Prakash, Joint Secretary, Ministry of Urban Development and Mission Director (SBM)-i sangdong ka nung metetdaktsü.
Quality Council of India (QCI) Chairman Adil Zainulbhai-ia ashiba agi, “Swachh Survekshan ajanga linük nung yimti 75 nung merükmejuba asadangtsü. Swachh Survekshan maparen takok ngua inyaktettsü atema yimti 75 nungi municipality tem aser idakji aliba nübortemi shilem agitsüla.”
Iba dak sendakba nung nübortemi national toll free number 18002672777 ajanga osnag agütsütsü akok. Ano #MyCleanIndia aser @swachhbharatgov. ajanga pei yimti indang noksa aser osangtem metetpelatsü akok.