India nunga ‘Baby Dove’ sayaogo

Mumbai, October 4 (Agencies) : Mongulbarnü Beauty brand Dove-i tanur anepaluba osettem yanglur rongnung densema India nung Baby Dove sayaogo.
Baby Dove ya actress Genelia Deshmukh aser TV sentong ketdangser Tara Sharma nati Mumbai nung sayatsü.
Genelia-i, “Baby Dove sayaba sentong nung parnoki nia tetsü ka ta züngshia shilem agidaktsüba atema kanga pelar,” ta sangdong ka ajanga metetdaktsü.
“Tanur ka anepalutsü atema asenok den yariteper, asen nüngdak angashir aser asenok angateter nüngdaker. Kechiba süra iba mapa ya temela masü. Asenok tasü itadaktsür nüngdaker. Ni mezüng aser tanabuba tanur soa bentsüdang nüngdakba balala ajangshia aruogo,” ta jabaso ana tetsü, Genelia-i ashi.
Baby Dove-i ‘Real Mothers Hear’ omen nung ajemdaker India nung tetsü kati ajangshiba aser taginüba tsütsü olemtepa asadangba sentonga ka agia liasü.
Iba survey nung US, Britain, India, China, Brazil aser Mexico linüktem nungi tetsütemi shilem agi aser parnoki ajangshibatem angadanger külen iba survey ketdang asür Genelia aser Tara naprongi item tetsütem dang tanur anepaluba nung shitak aser tai kecha mali anungji pei-i tang koma anepalua arur iba nung tali temulung lema inyaktsü ashi.
India nung tetsü noklang nung shilem 90-i tetsü tajung ka asütsü kanga khuret süa bilemba iba survey ajanga ngutetogo.
Baby Dove sayaba sentong nung Hindustan Unilever, Skincare nung tatong tir Prabha Narasimhan-i, “Brazil nung sayaba sülen India nunga Baby Dove sayatetba atema kanga pelar. Baby Dove osettem ya kanga tanük aser iba kija jagi tanur shi/tekep lanu kümzüka yutettsü,” ta ashi.
Item osettem ya tanur tekep ajak atema lir. Baby Dove osettem nung Baby Dove Rich Moisture Baby Bar, Baby Lotion, Diaper Rash Cream aser Baby Wipes den sensitive skin anepalutsü atema Sensitive Moisture Baby Bar dena lir.