India nunger angopur 650 shi kidanger linüktem nung pua lir

New Delhi, November 01 (Agencies): Taküm küm tenzüker taoba ita (October) tashi nung kidanger linüktem nung aliba maritime security agencies (MSA) temi India nunger angopur 650 shi pua lir. Parnok rongnung timba ka Sri Lanka nung pua lir.
Sorkar osang ajanga ashiba agi, Sri Lanka nung 402, Pakistan nung anogopur 239 den ango apudang amshiba rong 35, Bangaladesh nung 56 aser Burma nung trok pua lir.
Angopur timba kati kidanger linüktem tsütsü ‘Exclusive Economic Zone (EEZ)’ ajanga ia ango apuba ajanga MSA temi aputsüsa aküm.
October ita kija nung India nunger angopur 60 dak tema Sri Lanka navy aser Pakistan Martime Security agency temi puogo.
September aser October ita na nung India nunger angopurtemi Pakistan tsütsü tzü arrtsü alema ia ango apuba ajanga Pakistan MSA temi amaktsü tenzük aser iba lendong nung nisung taküma laluogo.
India nunger tzüküm anükertemi Gujarat sorkar dang state nung aliba angopurtem “no-fishing zone” alema meyoktsü ozüng agütsüogo.
September 18 nü India nunger angopur , arishi küm 40 ka Pakistan tsütsü tzü arrtsü alemer mile ter tashi ia ango apuba mapang kahsetba sülen iba ozüng ya züngtsü.
Ano October 15 nü India nunger angopursa ka arrtsü alema Pakistan tsütsüi aiba ajanga injang agi kaher yirua lir. Tang yirur alisangji Dhanji Bamaniya lir aser pa den nisung pongu dang kanga taochi sayua chiokba sülen Jakhau tzükümi meyipa aruogo.
Ketdangsertemi angopurtem dang International Maritime Boundary Line (IMBL) dang masü saka “no-fishing zone” tesem nungang süng ango maputsü metetdaktsüogo, aser shibai ozüng raksadir parnok documents tem meyipa meshitsü sangdongogo.
“Onoki Gujarat Fisheries Department nem iba osang agütsüogo. Onoki ozüng raksartem indang documents tem pua state nung bangdak pur nem agütsütsü,” ta tzüküm anükertemi ashi.
Pakistan nungeri pua aliba India nunger angopurtem indang rong 22 reprandanga tendangtsü atema India nungi teshimtet nisung kar Pakistan-i aotsü. Iba mapang parnoki pua aliba angopurtem chiokdaktsütsü asoshi olemtep akatsü.
Tzüküm anükertemi ashiba agi, Pakistan nungeri nisung chiokaka rongbo kodanga mechioker.