India nunger cr. 125-i yaria India tasen yangerdar: PM Modi

New Delhi, March 12 (Agencies): Ato kilonser, Narendra Modi teyari (nüboyimba) ajanga Uttar Pradesh nung küm 14 sülen assembly election nung BJP-i majority agi takok anguba sülen Deobarnü Modi-i, India tasen ka yangerdar aser ibaji ajanga terenlok atema nokdaktsü, ta metetdaktsü.
Modi-i twitter ajanga, “India tasen ka yangerdar, aser iba tashiji India nunger crore 125 ajanga lir. Iba linük India-i terenlok atema nokdaktsü,” ta metetdaktsü.
Paisa, “Nüjiso ngur 2022 küm kodang küm 75 jungdir, iba mapang tashi nungjibo Gandhi, Sardar Patel aser Dr Babasaheb Ambedkar nunger nüma tangtettsüsa India ya yangerteter alitsüla,” ta ashi.
Assembly menden 403 aliba state, Uttar Pradesh nung BJP-i menden 312 tashi nung takok angu. Ano BJP den teloktep Apna Dal (S)-ia menden 9 aser SBSP-i menden pezü angu, aser ajakji senteperbo teloktep mendenji 325 lir.
Ano külen Samajwadi Party-i menden 47, par teloktep Congress-i menden tenet aser BSP-ia menden 19 dang ngua liasü.
Amethi district kübok menden pezü ya Nehru-Gandhi kibong jenjang junga aliba medentem lir, ajisüaka tan election nungbo BJP-i menden asem tashi angu.
Ano BJP-i aniba teloktepi Ato kilonser, Narendra Modi adokba Lok Sabha constituency, Varanasi kübok menden tiprongla nung takok nguogo.