India nunger drone ka Sikkim nung China nunger litsü nung tsükok

December 7, 2017 (Agencies): Brehostibarnü China nungeri ashiba agi, Indian nunger drone kati parnok air space adena aita Sikkim len arrtsü nung tsükokogo,kong India aser China na tsüngda anogo 73 tashi mangatettep adoka liasü. Ajisüaka India nungeri ashiba agi, iba drone ya aibelena arrtsü adena ao.
China nunger Foreign Ministry ajanga iba maparen aitsüogo, aser New Delhi dang iba amala device arrtsü anasa mamshitsü asoshi amokmerenogo.
“Tawa India nunger aircraft ajanga China nunger airspace adena aitogo, aser Sikkim nung China-India arrtsü nung onok tsütsülen arua tsükokogo,” ta Ministry otongdar Geng Shuang-i ashi.
China aser India military na ita ana dak tali Sikkim len arrtsü Doklam tesem nung mangatettep adoka liasü. India Army-i China PLA-i Doklam nung lenmang yangluba anema liasü. Iba tesem ya Bhutan nungeria parnok indang ta ashir.
Indian Defence Ministry ajanga ashiba agi, Unmanned Aerial Vehicle (UAV) ya India nunger litsü nung teti ama training mission ka agia aliba mapang nung ali nungi iba tayimtsü azüokertemi technical tsütsü tebilemtsü adokba ajanga iba tayimtsü mazüokteti Line of Actual Control adena yima yok.
Iba tatlokba dak sendakba nung Ministry standard protocol nung anidaka Indian border security personnel temi idangjisa China nunger dang iba UAV bushitsü asoshi osang agüja liasü.
Iba tayimtsü ya Sikkm len ngutet asü ta asüngdang dang Geng-i ashiba agi, iba dak sendakba nung pai osang agütsütsüsa kecha meteta mali, ta ashi.
“Chinese border troops temi iba ken o angateta iba tayimtsü bushitetogo,” ta paisa ashi.
“Sikkim nung China-India arrtsü ya bentetogo aser arrtsü nung China tsütsü alibaji China nunger litsü lir.
“India nunger maparen ajanga China nunger sovereignty tsütsü aibelenogo, aser iba ya arrtsü nung yimjung, tesunep raksatsütsüba maparen ka lir.
“Iba maparen ajanga China nunger temulung maser aser India nunger den ashishitepogo.
“Arrtsü yimjung aser tesunep nung toktsütsü atema iba amala device arrtsü anasa amshiba anentsü atema China-i India dang asüngdangogo,” ta Geng-i ashi.
Taoba mapang Western Theatre Command’s Joint Staff Department, combat bureau, deputy head Zhang Shuili-i ashiba agi, “India nunger indang UAV (unmanned aerial vehicle) ya ozüng alema China nunger litsüi aita tsükokogo aser China nunger arrtsü nung aliba sepaitemi iba tayimtsü ya bushiteta jangjashiogo.
“India nungeri China nunger litsü adena aita iba jenjang agiba ajanga onok kanga temulung maser. Onoki China nunger national sovereignty atema nokdaktsü,” ta paisa ashi.
Iba tatalokba ya Foreign Minister Wang Yi, Russia-India-China meet atema India-i maru tsüngda atalok. Pai India semdangba mapang nung Sushma Swaraj dena ajuruteptsü.