India nunger kaket zülur trok ‘DSC Prize’ asoshi tenüng benokogo

November 27, 2015: India nunger kaket zülur trok, ‘DSC Prize South Asian Literature 2016,’ atema tenüng benokogo.

Iba senpet asoshi tenüng benoka aliba tenüngtem ya London School of Economics & Political Science nung Brihostibarnü metetdaktsü.

Tang tenüng benoka alirtemji Akhil Sharma (Family Life, Faber & Faber, UK), Anuradha Roy (Sleeping on Jupiter, Hachette, India), K.R. Meera (Hang Woman, Penguin, India), Mirza Waheed (The Book of Gold Leaves, Viking/Penguin, India), Neel Mukherjee (The Lives of Others, Vintage/Penguin, UK) aser Raj Kamal Jha (She Will Build Him a City, Bloomsbury, India) nunger lir.

South Asian Literature, DSC senpetji sen dollar 50,000 alitsü. Senpet angutsü atema kaket nung aliba otsüji South Asia dak sentakba otsü asütsüla.

Tetendanger rongnung mendenbuba Mark Tully-i, “Iba mapa ya kanga tasak. Tang aliba tarensen nung ‘South Asian fiction’ otsütem lir. Ajaki kangasa junga züluba ajanga shimtettsü kanga tasak lir,” ta sangdong ka ajanga ashi.

Item otsü kakettem nung ostü dak apet tesemtem kanga junga shitakaba angur amai rasaa lir, ta mapang talangka India asoshi BBC bureau chief ama inyaksang Tully-i ashi.

Iba tetoktepba asoshi pei linük oshi nung züluba kakettema züngoker aser senpet angu nungbo otsü meyiptsür den kasa lemdangtsü. Anungji iba inyakyim ajanga pei oshi nung otsü zülurtemi tetoktepba nung shilem agitetsü aser international nung meteta akümtsü.

DSC Prize for South Asian Literature nung takok angurtem tenüngji Sri Lanka nung January 16, 2016 nü akatsü aliba, ‘Galle Literary Festival,’ nung metetdaktsütsü.