India nunger Khristantemi Khristmas amongtsü tsübur

December 21, 2017: Khristmas atongtsü joko anogo ishika dang lia religious freedom charity, ADF International-i India nung Khristan tem reshikangshiba atema tebilemtsü akar, ta ashi.
Tawa Catholic putir 32-i kangshia Hindu nunger Khristan yimsü dangui meyipdaktsütsü meranger ta tai tongloktsü, asen Madhya Pradesh nunga yimtsüngtem nung lanurtemi kibong shia Khristmas carol tena atur ta aija police-i parnok apu.
ADF International den külemi inyaksemer, United Christian Forum national coordinator, AC Michael-i, takümbo India nunger Khristantemi Khristmas amongtsü tsübur, ta ashi.
Paisa, “Khristantem anema inyaktsü aser amokmerentsü südi ta onoki bilemer, ta pai ashi.
ADF nungi Jennifer Lea-i India nung Khristantem reshikangshiba kuli balala osangbener den lemsatepa liasü.
Lai, “(Khristantem reshikangshiba) Tongti telokji Hinduism lir. Tang BJP party sorkar tashi nung lir aser parnoki linük nütsüng shilem 100 Hindu kümdaktsütsü nükjidong lir ta shiogo, ibayongji Khristan yimsü samadaktsütsü atema parnoki asalentong yanglur inyaker,” ta ashi.
“Parnok yimtsüngtemi aoer, aser pastor tem aridoker,” ta lai ashi.
Iba dak sendakba nung ADF International indang lawyer temi item ken o reprangshidar.
Tangartembo chiokogo ajisüaka putir kabo tang tashi mechioki lir aser charity osang ajanga ashiba agi, pa dang senchi 5,000 meshia aitsür.
ADF-i, “Tzü nung baptibaji evangelical Khristantem inyakyim ka lir, Catholic putirtemi tamangba yimsü agizüksang tenütsü nung tzü raklokja dang baptitsür. Aser ibaji ajanga tiyazü nung Khristantem nem tai tongloktsüba kuli sayur,” ta ashi.
Lea-i alima nung Khristantem dang India nung Khristantem anema tim mesüi inyakba anema nokdaktsü ayongzükogo.