India nunger kobi melei World Cup nung asayatsü

Kolkata, October 29 (Agencies): Sports Minister Rajyavardhan Singh Rathore-i, FIFA Under-17 World Cup India nung kanga takok ngua asayatetba ajanga linük nung football asayar lanurtem ajungmesoa tarutsü nung parnok asaya renloka World Cup nung qualify asütsü asoshi rangloker asayatsü atema imlaba lemsatep.
“Asenok kanga jung tenzükogo, aser yangi manentsüla. U-20 World Cup asenoki angutsü imlar. Iba amai dang ora kobi melei India nungera asenok sasa dang World Cup nung qualify asütsü, ta amanger,” ta Rathore-i ashi.
Rathore, shiba U-17 World Cup sempet agütsüba sentong nung shilem agitsü asoshi jaoka liasü, pai ashiba agi, sporting organizations tulu FIFA amalai India jangjaa kümogo, anungji iba maongka ya asenoki tajungtiba nung amshitsüla.
“U-17 World Cup India nung asayaba ya asenok asoshi nema adangtsü maparen ka lir. iba ajanga alima tsüngdang India jenjang ajungketogo. Taoba mapang nung India nung maliba asayamung tulutem India nung asayatsü nüngdaker ta angateta arudar.
“Fan temi kanga telangzüba tajung agütsüogo, asenoki World Cup reprangtsü asoshi nütsüng timtiba sentepa record ajak break süogo,” ta Rathore-i ashi.
Olympics silver medalist-i ashiba agi, football ya pan-India asaya ka kümdaktsütsü asoshi mapang tongogo.
“Football ya West Bengal, Goa aser NorthEast tesemtem nung dang nungtugu lir, aser tang iba asaya ya linük ajunga nung nüngtugu kümdaktsütsüba maongka tajung lir.
“Center nungi onoki infrastructure tali yanglusemtsü asoshi takok tashi inyaktsü. Nenoki infrastructure tem aser tejen yanglushiba tem ajak nguogo aser item ajak ajanga kanga temolung süogo. Joko asenok taruba asayamung asoshi renemtsü nüngdaker,” ta paisa ashi.
Pai maneni Kolkata nung aliba nüburtem tenüngsanga liasü.
“Kolkata nung asaya meimer aika lir. parnoki asaya tajungba angateter. Parnoki asaya atemba sülena sentong madem tashi ataa liasü. Parnoki telok anaprongla dang akhümtsübu sayuogo. Kolkata nung aliba fan tem dang pelaba lemsateper,” ta paisa maneni ashi.
Kasa mapang nung ministry ajanga National Anti Doping Agency (NADA) nem cricket asayartem domestic aser international cricket match asayaba mapang nung tetendangba agitsü asoshi tetuyuba agütsü magütsü, ta asüngdangba nung pai kecha telangzüba magütsü.