India nunger kümzüka anitetba atema pelar : Akshay Kumar

Mumbai, July 17, 2016 : Bollywood actor Akshay Kumar-i South Sudan nung lendong ataloka nisung noklang aika sür tettsübu tatenden nung aliba mapang Operation Sankat Mochan inyakyim ajanga India nunger iba lendong tesem nungi anitetba atema tenüngsang agütsü.
Pai External Affairs Minister Sushma Swaraj dang South Sudan nung aliba India nunger tekaratiba nung anitettsü mepishia liasü.
Pai, “Operation Sankat Mochan ajanga South Sudan nung aliba India nunger kümzüka anir aruba atema aser Sushma Swaraj o Gen VK Singh nungeri iba mapa takok ngua inyaktetba atema tenüngsang agütsür,” ta twitter ajanga lemsatep.
South Sudan nung alir India nunger, Kerala nunger 46 dena parnok nisung 156 tashi ‘Operation Sankat Mochan’ inyakyim kübok special IAF tayimtsü nung Hokolbarnü kümzüka anir aruogo. Iba operation ya Sushma Swaraj aser External Affairs Minister V.K. Singh na lenisüba nung takok ngua inyaktet.
“Airlift” film nung tongti shilem agisang Akshay-i India nunger tekaratiba nung kümzüka anir arutsü mepishidang Sushma Swaraj-i, “Akshay Kumar na imlibelema shisa tebulu. Onoki Juba (South Sudan) nungi India nunger ajak anitettsü,” ta langzüa liasü.
Pa “Airlift” film nung shilem agiba ajanga tan iba lendong atema ya pai kanga shishia bilemtsü.
“Airlift” ya 1990 küm Iraq nungeri Kuwait amakba mapang yangji aliba India nunger tayimtsü ajanga kümzüka anitetba otsü lir.