India nunger nüngtugu Scientist Bhargava-i Award meyiptsür

New Delhi, October 29 (Agencies): Tang India linük nung tamangba lokti tsüngda tesempatep, kaket keno zülurtem tepsetba aser yimtenren nung mepetmesü aliba anama kaketzülur, sangro zülur aser shisashir aikati lungkak aita pei award meyiptsüba mapang ka nung tan hopta scientific community nungia ola adokdagi.

Ato kilonser Narendra Modi leniba nung Hindu Nationalism anema Brihostibar nü linük nung nüngtugu scientist katia linük nung temaba civilian award meyipa agütsüogo.

Times of India osangkaket den jembidang linük nung Centre for Cellular & Molecular Biology tentetsang, P.M. Bhargava-i, “Sorkari kaket keno zülurtem, shisashirtem aser science temeten nokdangba ajanga ni Padma Bhushan Award meyipa agütsür,” ta sangdong.

“Science tsütsülen ni anguba award 100 dak tema rongnung Padma Bhushan award ya-a ni atema senti liasü,” ta Bhargava-i ashi.

“Sorkari tamangba yimsü ka reju kümdaktsütsü merangba iba den külemi temeten aser scientific tanela sotba ajanga tangbo ni iba (award) atema ya mebilemer,” ta ashi.

India sorkari agütsüba award meyipba agütsür rongnung scientific tentet nungi pa mezüng asüsü.

Ajisüaka tanga tentettem nungibo taoba hopta ishika tsüngda nüngtugu nisung aikati award meyipa agütsüogo.

Bodhbar nüa film yanglur nisung 13-i national awards meyipa agütsüogo.

Bhargava-isa, “Nüburtem dang kechi asemtsü, kechi shisadangtsü, kechi achitsü aser shirnok meimtsü, ta tuyuba India nunger tangatetba ya onoki ashishir,” ta ashi.