India nunger sepaitem nem secure mobile phone agütsütsü

New Delhi, March 11 (Agencies): Kobi melii sorkari International arrtsülen aliba sepaitem aser Maoists telungpurtemi timtem agütsüba tesemtem nung aliba sepaitem nem secure mobile phones agütsütsü, ta Hokolbarnü Minister of State for Home Affairs, Haribhai Parthibhai Chaudhary-i metetdaktsü.

New Delhi nung sentong ka nung jembidang Chaudary-i, “Tanü tashi asen sepaitem ket nung mobile phone mali ta metetba ajanga nenok süngmangtsü. Mapang tatsüka tsüngda arrtsülen aliba sepaitem aser Maoists telungpurtemi timtem agütsüba tesemtem nung aliba sepaitemi 3G mobile connection ajanga parnok kibongtem den tongtepratepa jembitettsü atema mobile phone agütsütsü,” ta ashi.

Associated Chambers of Commerce & Industry of India (Assocham)-i ayongzükba 8buba International Security Summit tenzüktsüdang pai, “Mobile phone nung jembidang line maotsü, kechiyong onok ket nung telephone exchange alitsü aser ibaji battalion-i parnok aoba ajaklen amshitettsü,” ta minister-i ashi.

“Tawa ni US nung aliba company ka nungi teshimtet telok ka ajurudang parnoki onok nem box ka nung telephone exchange agütsütsü aser ozü sepaitem atema 1,000 dak tema secure mobile phone connection agütsütsü ta shiogo,” ta paisa ashi.

Minister-i, US nung aliba tanga company ka pai ajuruogo aser parnoki blood testing equipment agütsütsü ta shiogo, koba ajanga minute ishika tsüngda azü tendangba ajanga army tem mapang kanga kümzüktsü, ta ashi.

Linük nung cyber crime nokdangtsü atema ozüng tapet maliba dak sentakba nung Chaudhary-i, “Technology renlokba den liromedema ozüng yanglutsü atema onoki judicial inyakyim ka tenzükogo,” ta ashi.

“Cyber crime atema onoki Home Minister, Rajnath Singh leniba nung IT mongintemi akumba high level committee ka tentetogo,” ta paisa ashi.