India nunger shilem 0.08-i dang temang shilem tenlar

New Delhi, August 13 (Agencies): Spain aser Belgium nunger shilem 70-80-i pei temang shilem tenlar aser iba denji medemdangra India nungerbo shilem 0.08-i dang pei temang shilem tenlar, ta Honibarnü health mongintemi ashi.
Kümshia India nung nisung 200,000-i tezüngjang (kidney) tasen nüngdaker aser nisung 100,000-i temesen tasen nüngdaker, ajisüaka temang telen nüngdakba noklang nung shilem 2-3 shi dang angur, ta parnoki Organ Donation Day anogomung, August 13 nü metetdaktsü.
India nunger nütsüng ishikati dang temang shilem tenlaba kulji mangatetba ajanga, ashi-abongba aser regulatory framework maliba kulitem ajanga lir, ta health mongintemisa ashi.
“Temang shilem tenlatsü mapa ajungketjaka India nung temang shilem tenlaba kanga ajema aliba ya kanga tia maka. Tesüiba küm ana nung temelenshiba mali,” ta Saroj Super Speciality Hospital nung Centre for Liver Transplant & Gastrosciences Director, Ravinder Malhotra-i tesasaba olen ka ashi.
“Tsüraburtem den angatettepa tanurtemji temang shilem/telen tenlartem kümdaktsütet. Temang shilem tenlatsü atema rasaa ashitsü aser ajungkettsü nüngdaka lir,” ta paisa ashi.
Malhotra-i ashiba agi, temang shilem sademsadema tenlatsü atema ozüngtem alitsüla.
Anüdoklen aliba linük kar nungbo senso ka tasümang state keti ora parnoki temang shilem tenlatsü atema telemtetba agiteter, ta doctor kari ashi.
Delhi nungi Doctor, P.K. Bhardwaj-i, “Nisung timbaka temang shilem transplant asütsü atadang asür, kechiyong temang shilem kanga ajema angur. Medical jenjang apir  transplant asütsü atema temang shilem aser tissue tenlatettsü,” ta ashi.
AIIMS-New Delhi, Organ Retrieval Banking Organisation-i ashiba agi, 2010 küm linük nung nisung 22,500-i parnok asüba sülen temang shilem tenlatsü tenüng agütsüogo.
Health mongintemisa, tamangba yimsü lenirtemi temang shilem tenlatsü ajungshitsüla, kechiyong nisung aikati tamangba yimsü nung ajemdaker temang shilem metenlar, ta ashi.
AIIMS nung doctor, Bhavadee Sharma-i, “Nisungtemi azü melungsoa tenlaba ama temang shilema tenlatsüla. Iba atemaji mapang agitsü, saka tarutsü nungbo ibaji ataloktsü,” ta ashi.