India nunger shooter temi takok tajung angu

Putian, Yimpoksüi/November 22 (Agencies): ISSF World Cup Finals nung Hokolbarnü India nunger lanur asayartemi kanga junga asayaogo.
Brehostibarnü asayamung mezüngbuba anogo Manu Bhaker, Elavenil Valarivan aser Divyash Singh Panwar nungeri gold medal angu. Maneni tanabuba anogo nunga parnoki mixed events nunga takok tajung nguogo.
Air Pistol Mixed Team event final nung Russia tsür Artem Chernosov den longjemer Manu Bhaker-i gold medal angu aser Saurabh o Anna Korakaki nati silver medal ngua liasü.
10m Air Rifle Mixed Team event nunga India nunger asayar Divyansh aser Croatia nunger asayar Snjezana Pejcic nati gold aser Apurvi Chandela o China nunger asayar Zhang nati silver angu.
Taküm tetsür 10m Air Rifle event nung India nunger asayartemi World Cup gold medal pongu nungi pezü koktetogo.
Brehostibarnü tebur 10m Air Pistol event nung Abhishek Verma o Saurabh nata final atema qualify asü saka tena jenjang 5 aser 6buba nung tembang.