India nunger SV Sunil ‘Asian Hockey Player of the Year’ shimtet

Muscat, March 31 (Agencies): Brehostibarnü Asian Hockey Federation (AHF) ajanga India nunger Hockey asayar SV Sunil ‘Asian Player of the Year 2016’ aser Harmanpreet Singh ‘Asian Promising Player of the Year’ shimtet.
FIH Champions Trophy, London nung asayaba mapang Sunil-i kanga junga asayaba ajanga India nunger ya tanabuba jenjang tongtet. Sunil ya asayaba moapu nung tekaratiba nisung, ta züngshir aser pa ya India nunger Hockey asayar telok nung vice-captain lir.
Asia nung aliba national team indang coach ajanga iba sempet agütsütsü asoshi 2016 küm parnoki asayaba repranger shimtet.
Asia nung aliba national team indang coach ajanga iba sempet agütsütsü asoshi 2016 küm parnoki asayaba repranger shimtet.
“Ni amanger, India nunger hockey asaya ya küm shia tajungba akümer aser 2016 küm onoki mamatettsüa takok aika ngutetogo. ‘Team work’ mali asübo iba sempet ya mangutsü asü. Hockey India ajanga tanen makai yariba, coach tem aser ketdangsertemi kibong ka ama anepalua yariba asoshi kanga pelar. Iba sempet ajanga asayartem tali ajungshitsü,” ta Sunil-i ashi.
Harmanpreet ya 2016 küm kanga junga asaya aser pa dena asayaba nung India-i Junior World Cup akok. Harmanpreet ya 2016 Rio Olympics aser London nung FIH Champions Trophy nunga kanga junga asaya.
“Ni amanger, 2016 küm ya India nunger hockey asayar asoshi küm tajung ka asü. AHF ajanga iba konang tulu kü nem agütsüba asoshi aser Hockey India ajanga maneni yariba asoshi kanga pelar,” ta Harmanpreet-ia ashi. Harmanpreet ya Sultan Azlan Shah Cup asayatsü asoshi training agiba mapang ka lir.
Hocky India nung tir, Mariamma Koshy-ia iba sempet angurtem dang pelaba metetdaktsü.
“India nunger hockey asayar asoshi mapang tajung lir. Captain aser goalkeeper, P.R. Sreejesh-i Padma Shri Award angu aser Asian Hockey Federation ajanga Harmanpreet Singh aser Sunil-na nem ‘Asian Promising Player of the Year’ aser ‘Asian Player of the Year’ sempet agütsüba ya takokba tulu lir,” ta Koshy-i ashi.
“Asayartemi meranga asayaba aser ketdangsertemi kibong ka ama mapa ajak inyaka takok bener aruba asoshi pelar. Iba ama sempet anguba ajanga tarutsü nükla tuluba yur meranga inyaktsü imlar,” ta paisa ashi.