India nunger tanur crore 8.4 school-i maor: Census

New Delhi, September 23 (Agencies): Tang tasen sayaba Census 2011 data ajanga taoksatsü osang ana sangdongogo- India nunger tanur lakh 78 school-i oaka parnok tebok mesütsü atema aayangdaktsür, ano külen India nunger tanur crore 8.4 school-i maor.
Linük nung kaketshir nütsüng ajak den medemdangra mapa inyaker tanurtemji ishika dang, ajisüaka ibaji ajanga kibongtem aser tanurtemi shisaliok nung temelung magütsüba kuli sayur.
Ano shisaliok angutsüji jenjang tasak, anungji arishi küm 5 nungi 17 tashi purtem atemabo shisaliok angati agütsütsüla.
Aayanga mapa inyaker school tanurtem rongnung tebur shilem 57 aser tanüngba shilem 43 ji tetsürtem lir.
Mapa inyaker aayanger tanurtem rongnung karbo arishi küm trok tanurtema lir, aser tanur shilem 68 tilateri mapa inyakertem lir. Item mapaji ita trok mesüra iba dang ishiba lir- aser item mapaji aluyimba mesüra teka mapatem lir. Ajisüaka parnoki maparen balala aika nunga teyaritepertem ama inyaker. Ano tanur shilem 32-ibo tongtibang mapatem küm tepiyong inyaker. Item kuli ajanga tanurtem shisaliok nung koma kongshir, itemji ano masadang, ajisüaka item ya ajanga tanurtem majangzüker.
Ano kanga taoksatsü osang kaji- linük nung tanur crore 8.4 school-i khenyongi maor, aser parnok rongnungi shilem 20 jungnüabo Right to Education Act küboki aiter, ta Census data nungsa shia lir.
School-i maortem tetsür aser tebur kasa shi dang lir. school-i maoba tongtibangtiba kuliji parnok mapa inyakdaktsüba ajanga lir, ta kasa osang ajanga ashi.