India nunger tebur shilem 48-i moko achir: JP Nadda

New Delhi, April 29 (Agencies): India nunger tain shilem 35 (crore 27.5)-i moko balala achir; moko achir tebur shilem 48 aser tetsür shilem 20 lir, ta tanü sorkari Lok Sabha nung metetdaktsü.
Moko taseptsü shilem 85 nungbo tekümdangtsü noksa aser o amshitsü atema ozüng tasen yangluogo, iba nungji ozülu nung tekümdangtsü shilem 25 densema lir, ta Union health minister, JP Nadda-i ashi.
“Global Adult Tobacco Survey (GATS-India 2010) ajanga sayuba agi, India nung tain shilem 35-i moko tapu ka mesüra karbosa achir. India nung moko achir crore 27.5 shi lir, iba nungjagi memesepba moko achir crore 16.37, mesepba moko achir crore 6.9 aser mesepba moko den memesepba moko naprong achir crore 4.23 lir,” ta Union minister-isa metetdaktsü.
Pai ashiba agi, India nunger moko achir tebur shilem 48 lir aser tetsür shilem 20 lir aser moko kanga bulua achirtemji yimti nung alirtem dang nungibo yimtsüngtem nung alirtem timba lir.
“Yimtsüngtem nung tebur tesadang dak timba (shilem 52) aser tetsür shilem 24-i moko achir, aser ibaji yimtitem den medemdangra yimtitem nung tebur shilem 38 aser tetsür shilem 12-i moko achir,” ta Nadda-i ashi.
Tobacco Control in India (2004) osang ajanga ashiba agi, moko achiba dak sentakba tashitak balala ajanga India nung kümshia nisung lakh 8-9 shi asür, ta paisa ashi.
2008 küm India nung mesepba moko aser nisung asüba indang bushisüngdangba ka ajanga ashiba agi, mesepba moko ajanga linük nung anojungi nisung jenti asür ta bushitet. Kasa study ajanga, 2010 küm India nung moko mesepba ajanga nisung lakh 10 shi asütsü ta bushiteta liasü, ta paisa metetdaktsü.