India nunger telungpurtem meindoktsü: Myanmar army

Imphal, October 29 (Agencies): India linük nem lendong agütsür telok ka danga Myanmar lushi nung melidaktsütsü ta Myanmar sepai ketdangser kati ashi.
Anogo asemnü India-Myanmar regional border committee senden nung o jembidang, Myanmar Army nung North West Command commander, Major General Phone Myat-i iba osang metetdaktsü.
“Myanmar commander-in-chief lenisüba kübok sepaitemi item ama telungpur teloktem anema raratsü” ta paisa ashi.
Imphal nung aliba Inspector General of Assam Rifles indang headquarters nung sendenji amen aser Myanmar nungia züngsem 18 agi akümba teshimtet telok ka aden.
Iba senden ya Indian Army nung Spear Corps-i ketdangsüa agi aser Lt General Anil Chauhan, GOC, Spear Corps-i anir India nunger teshimtet telok aden.
National Socialist Council of Nagaland (Khaplang), National Democratic Front of Bodoland (Songbijit), United Liberation Front of Assam (Independent), Kamatapur Liberation Organization teloktemi Myanmar nung tesep tenteta lir ama bilemer.
Tesüiba küm ishika tsüngda Myanmar nung jenoka aliba telungpurtemi Indian security forces makyonga arur. Iba atema Indian special forces-ia India-Myanmar arrtsülen telungpurtem anema ‘surgical strikes’ süogo.
Myanmar nung sepai ketdangser tongti kati iba osang metetdaktsüba ya Centre atema osang tajung ka lir.