India nunger temeyoktep sobaliba kümzüka ayutsüla: Sharad Yadav

New Delhi, August 07 (Agencies): Tawa Bihar Chief Minister, Nitish Kumar-i JDU-i BJP den loktepbaji kanga tia maka ta jembisang Janata Dal (United) lenir, Sharad Yadav-i, yimtenren nung ajak dendaktsüba ajanga dang India nunger temeyoptep sobaliba ya kümzüka yutettsü, ta metetdaktsü.
August 17, 2017 nü Yadav-i Delhi nung lokti senden ka ayongzüka lir, aser iba senden nung party lenirtem, Opposition lenirtem, lokti lenirtem, aluyimer tentet lenirtem, Dalits, backwards, Muslim nunger aser Samajwadi Parivar nungi lenirtem adentsü.
Iba senden dak sendakba nung osangbener den jembidang Yadav-i, “India nung sobaliba temeyoktep aika lir, aser iba sobaliba ya ajanga yimtsüng, state balala aser India nung tamangba yimsü balala aser kin kidong temeyoktep balala aika tesünep nung külemi liteter. Anungji nisung ajak dendaktsüba yimtenren ajanga dang India nunger temeyoktep sobaliba kümzüka yutettsü,” ta metetdaktsü.
Yadav-isa, “Iba senden omenji ‘Sajha Viraasat Bachaho Sammelan (India nunger temeyoktep sobaliba kümzüka yuang’ asütsü,” ta metetdaktsü.
August 19, 2017 nü Nitish Kumar-i Bihar yimtiba, Patna nung JDU executive senden ayongzüka lir, aser iba senden atongtsü anogo ana lia Yadav-i Delhi nung iba senden ya ayongzükogo.