Dubai, January 29 (Agencies): India nung violin atemertemi ‘god of the violin’ ta ajasang L. Subramaniam-i February 10 anungi 11 nü tashi Oman nung amungtsü aliba ‘Open Minds’ senden nung o jembirtem chiyungba benjung nung violin atemtsü, ta osangbenertemi metetdaktsüogo.
Iba chiyungba benjung ya ‘Open Minds’ senden nung o jembirtem atema balaka renemba lir aser iba sentong ya Shangri La, Muscat nung aliba Turtle Beach nung February 10 aonung akatsü, ta Times of Oman ajanga metetdaktsü.
Subramaniam dang “Paganini of Indian classical music,” ta-a ajar aser pai India o western tesem indang music meyoktepa atemba ajanga nüburtemi kanga sapur.
India nung violin atemer rongnung tajungtisang, Subramaniam-i nüburtemi anganütsüsa music yangluba ajanga pai atema violin ajaki kanga sapua anganer.
South India classical music aser western classical music tema kensep yanglurbo pa dang lir. Pai orchestral aser orchestra masüba kentem den film ken aser music tapu balala mejema lir.
“Pai atemba music ji India music dak amendaka lir ajisüaka alima rangben nung agizükteter,” ta mongintemi ashi.
Subramaniam-i tan sentong nung “fusion music” atemtsü renema lir.
‘Mapa tasen kar merangdangba ajanga lenmang tasen lapokba’ omen nung ajemdaker Open Minds sentong ya ayonga amungtsüba lir. Iba sentong ajanga Oman nunger entrepreneurs tem inyakyim tasen asoshi ajungmesoa tesayuba agütsütsü, ta Black & White otongdar kati ashi.
Iba senden ya tajangshiba, shisatsü tasen anguba, tebilemba tajung, amanga inyakba, ajungmesoba aser inyakteta sayuba tsütsü tesayubatem agi sünga alitsü, ta pai shisem.
Iba ananü amungba senden nung alima rangben nungi tebilemdanger tajungtem arua shisatsü tajung aketba o den ajangshia arubatem nungi nüngdakba shisatsü lemsateptsü.
Iba sentong nung entrepreneur Chris Gardner, Princess Beatrice of York, tesüiba mapang Netherlands nungi football asayar Ruud Gullit nunger den ano tebilemdanger aser temelenshi tsütsü lenirtem aika arua o jembitsü renema lir.
You must be logged in to post a comment Login