India nungeri parnok aitsüba magizük

Goldcoast, Metsüremi 31(Agencies): Commonwealth Games Village nung India nunger asayartem anenba anasa syringe ngutetba sülen India nungeri parnoki kecha tai minyak ta shiogo.
Osang ajanga ashiba agi, syringe tem ya India nunger asayar kar anena aliba tesem nungi ngutet. Ajisüaka iba ya shirnok meyongar tang tashi mejangja.
Commonwealth Games Federation (CGF) chief executive David Grevemberg-i ashiba agi, athletes’ village nung staff kati parnok dang syringe ngutetba indang shiogo aser iba ken o ya asadangtsü.
Ajisüaka India nunger ketdangsertemi ashiba agi, syringe tem ya parnokiang CGF medical commission nem agütsü.
“Syringe ya India nunger asayaretm takdang nungi ngutetba masü, saka tanga linük nungia asayartem aika anena aliba kasa building nungi ngutet. Iba ya onok meyong masü,” ta India nunger ketdangser kati ashi.
“Syringe ya India team doctor temi medical commission nem agütsü aser parnoki aji indok. Parnoki onok dang tasüngdangtsü kecha maliasü aser iba sülen parnok den onok kecha tesendaktep maliasü. Parnoki onok dang temulung malemba ya tim masü, onokbo yimya tajungba benshitsü merangba liasü,” ta ketdangserisa ashi.