India nungertemi ochimashi sempar: PM Narendra Modi

Washington/New Delhi, June 26 (Agencies): Linük nung sorkari ochimashi anema inyakba metetdaktsüdang Ato kilonser, Narendra Modi-i, tesüiba küm asem nung par sorkari ochimashi inyaka mali, aser sorkar tarak maket, ta metetdaktsü.
Modi-isa, tesüiba mapangtem nung sorkartem tashi nungi agienbaji ochimashi ajanga lir, ta ashi.
Hombarnnü US, Virgnia nung aliba Tysons Corner, Ritz Carlton nung India-America nunger nisung 600 shi den jembidang Ato kilonser, Modi-i, “India nungeri ochimashi sempar,” ta ashi.
Ato kilonser Modi-i US nung aliba India nunger dang, India-i jenjang tasen alangzüktsü atema par sorkari maneni inyaktsü, ta metetdaktsü.
“Tesüiba küm asem tsüngda ozü sorkar nung ochimashi maliasü, aser ozü sorkar tarak maket,” ta paisa ashi.
“Technology ajanga teladak inyakyim bener arutsüogo, aser iba ya ajanga India nung sector ajak nung jenjang tasen alangzükogo,” ta Modi-i ashi.
“Yimsüsüba aser terenlok mapatem nung technology taliba amshitsü atema rangkoker inyakdar,” ta paisa ashi.
“Tang linük nung terenlok mapatem kanga keraa inyakba ya, nüburtem tejangraba aser parnok teimla ajanga lir. India nungeri imlaba ataloktsütsü atema onoki inyaker,” ta pai ashi.
Modi-isa, tang India-i foreign direct investment aika agizükdar aser credit agencies aser multilateral fora aikati India indang kuli tajung agütsüdar, ta ashi.
“Tanübo alima linüktemi sen intoktsü tesem tajungtibaji India ama bilemer,” ta shia pai US nung aliba India nunger dang India terenlok atema yaritsü mepishi.