India nungi nashi shibelenba ajanga Bangladesh rongsenkettsüng nung timtem ajurur

Dhaka, July 15 (Agencies): India nungi ozüng alema nashi shibelenba ajanga Bangladesh indang rongsenkettsüng nung timtem ajurur ta Honibarnü Border Guards of Bangladesh ketdangser kati ashi aser paisa Border Security Force (BSF) dang iba mapa nokdangtsü atema mepishi.
“Ozüng alema nashi shibelenba ajanga ozü linük rongsenkettsüng nung timtem ajurur. India nungi nashi bener marura, ozü linük nung dairy farmers jenjang tajungba akümtsü aser onok sasa litettsü” ta BGB Region Commander Addl Director General, Md Zahid Hasan-i osangbener dang ashi.
“Onoki BSF dang nashi shibelenba inyakyim nokdangtsü mepishiogo” ta paisa shisem.
Anogo pezünü BSF-BGB Border Coordination Conference nung BGB ketdangser aden aser paisa ashiba agi, iba mungdang nung tongtipang onüktem rongnung nashi shibelenba ya ka liasü.
“Nashitem jagi parnok sasa arrtsü adena mesenzütettsü. Onoki ozüng alema shiruru shibelenba meinyaktsü atema mepishiogo, kechiyong nashitemji India nungi bener arur” ta paisa metetdaktsü.
BGB region commander aser Meghalaya frontier BSF IG P K Dubey nati India kübok Meghalaya state nung Director General of Police S B Singh den ajurutepa shiruru shibelenba aser arrtsülen ozüng alema mapa inyakba onüktem benoka lemsatep.
“Mapang shia osangtsüsang lemsateptsü atema action plan ka yangluogo aser arrtsü anatsülen ozüng alema mapa inyakbatem nokdangtsü atema BGB aser BSF nati mapang shitak nung mapa inyaktsü jembiogo” ta Md Zahid Hasan-isa ashi.
BSF-BGB conference ya küm nung anaben ayongzüka agir aser tesüiba mapang agibaji yaküm November ita Sylhet nung agia liasü.