India nungi Sikh temeshi aieni aortem Pakistan tongogo

Islamabad, November 21 (Agencies): India nungi Sikh temeshi aieni aortem parnok nisung 2,500 tashi 547buba Guru Nanak Dev tasoba anogo nüngtem nung tamangba sentong ka nung adentsü asoshi Lahore, Pakistan tongogo.

Parnok Lahore nungi Attock district nung aliba Hasan Abdal jilai ogo aser yangji parnoki security kanga tashi ita yur Panja Sahib temple semdangtsü, ta Dawn online ajanga metetdaktsü.

“Onoki Pakistan nem tetushi agütsür aser Punjab nem akümtsübu balaka agütsür. Iba tesem ya asenok tamangba nung lennirtem aliba lir,” ta temeshi aieni aor rongnung lennir Rumeet Singh-i Wagah railway station nung ashi.

“Asenok tamangba yimsü nung tekolakba Guru Nanak Dev-i nisung taküm ka jenjang, yimjung aser temeim osang sangdonga liasü,” ta pa shisem.

Pakistan sorkar-i temeshi aieni aortem anogo 10 nü amungtsü asoshi tajungtiba acha ayangba asoshi parnoki pelaba metetdaktsüogo

Ato Kilonser Nawaz Sharif-i India den tesendaktep tajung yuner, ta Evacuee Trust Property Board (ETPB) nung mendenbuba Siddiqul Farooq-i ashi.

Rumeet Singh-i, parnok Pakistani kecha timtem aser tetsükdaktsü majurui arua tongdaktsüba asoshi Pakistan aser India high commissioner naprong den pelaba lemsatepogo.

Brihostibarnü Pakistan high commission-i New Delhi nung temeshi aieni aortem asoshi visas 3,000 agütsü, ta pai shisem.

Parnok ya Hasan Abdal nung November 22 tashi amungtsü aser iba sülen Nankana Sahib-i aotsü.

November 24 nü parnok Farooqabad-i (Sacha Soda) aotsü aser November 25 nü Nankana Sahib-isa meyipa aritsü.

November 26 aser 27 anogotem nung parnok Lahore nung aliba Dera Nawab Sahib temple nung amungtsü aser November 28 nü Narowal nung aliba Darbar Sahib temple-i meyipa aotsü.

Iba sülen parnok November 29 nü India-i meyipa arutsü.