India o China na meraratsü: CM Pema Khandu

Itanagar, August 10 (Agencies): Arunachal Pradesh Chief Minister Pema Khandu-i ashiba agi Arunachal Pradesh nung Indo-China arrtsü nung tang tashi nungbo kecha timtem mali aser rara adoktsüsa kecha mangatettep mali. “Arrtsü nung tangbo kecha mangatettep mali aser linük ana meraratsü kechiyong rara ajanga linük anaprongla akoksatsü ta jangjaa meteta lir,” ta Khandu-i osangbenertem dang ashi. Pai ashiba agi, External Affairs Ministry ajanga maneni China den yimjung atema sensaksemdar aser yakta iba tebilemtsü agintsü. “China nungeri Arunachal ajunga ya parnok meyong ta teti ashir saka aji parnok tebilemba dang lir aser iba ken o ya diplomatically bentetdar aser External Affairs Ministry-i iba dak sendakba nung maneni sensaksemdar aser iba tebilemtsü yakta bentettsü,” ta pai ashi.
Arunachal arrtsü len China den medemdangra state nung terenlok kecha maliba ajanga nüburtem tezüdanga liasü, saka Ato Kilonser Narendra Modi lenisüba tang tensa kanga kera melenshia odar. “Terenlok tsütsü onok kanga atsüngzüka liasü , saka PM-i aachaayanga arrtsü nung terenlok kanga keraa odar,” ta CM-i International Day of World’s Indigenous People rally ka nung jembidang ashi.