India o Israel na

Taoba hopta India ato kilonser Narendra Modi Israel nung oagi anogo asem nü monger aruba ya India o Israel kin na tsüngda otsü tasen tajung ka tenzüker asütsü. Atangji, India o Israel na tsükchirbo masü saka India nunger ato kilonseri Israel semdangbaji tang Narendra Modii semdangba ya mezüng liasü. Ibayongji, Modi Israel yimtiba Tel Aviv tonga aruba mapang, pa agizüka jembidang, Israel ato kilonser Netanyahu-i ozü limai India ato kilonser arutsü asoshi küm 70 ataogo ta metetdaktsü. 1948 küm Israel-a alima nung nüchiso akaba kin ka ama akümba sülen la United Nations nung züngoktsü asüngdang dang Indiaibo la pu masem. Ajisüaka, Israel o India na tsüngda 1992 küm India nung Narashimha Rao ato kilonser asüdang pa leniba nung tesendaktep kanga junga yanglua toktsü. Iba sülen tang India ato kilonseri Israel tonga oagi semdangbaji kin anaprongla atema tepelatsü osang lir. Aji oda, Modi ato kilonser inyaker shisa kaa inyakba mapatem rongnung pai mezüng Israel semdangba mapa ya ka asütsü. Israel ya Muslim kintem agi meketbanga lir aser talisa Palestine nungertem denbo tongpang rara manener. Iba ama lima ka den India tesendaktep tajung alitsübaji kanga nüngdaker. Tamangba tsütsüa India nung Hindu nungertemi Khristan-tem anema tashiyim mapa inyakaka, Yihuda nunger o Hindu nunger na tsüngdabo tamajung kecha mali. Aji oda, Israel ya alima nung raraba oset yangluba maparen nung mongin asünungji, India-i Israel nungi raraba osettembo tamalen nungi agia aru. Iba amaji raraba oset ayokba aser aliba aser aluyimba maparen nung yariteptsü lenmang sadema aliba den kin anaprongla atema kasa tsükchir tapu ka lir. Ibaji Muslim nunger kiralongrartem. Iba shisabolu jagi India o Israel na longjemdaktsür. iba dakji alaka Narendra Modi oagi Israel nung alidang kin ana tsüngda yariteptsü lemtetba wadangtemji aluyimba, tzüyim tzü agi tajemtsü tzü küma yangluba, science aser Technology mapatem nung liasü. Atangji, India-i Palestine aser Israel na tsüngda yimjung asoshia jembitsüner aser aji takoktsü. Iba atema taküm Palestine tir Mahmoud Abbas India-i arua amongba mapang Modii pa den jembia lir. Aji oda, India-i Israel aser Paelstine na tsüngda yimjung alitsü asoshi tebang ia jembitsüba ajanga, talisa, West Asia nung India ya yimten khuret abener tongtibang ka kümadoktsü. Iba denji külemi India ato kilonser Israel tashi tonga orr yangji senso küma alir India nungertem dang India o Israel na tsüngda senzüsenongtsü asoshi maparen temelaba kümdaktsütsü aser tayimtsü senzüba maparentema tajungba kümdaktsütsü nangzükba ajanga kin ana tsüngda tesendaktep tajungba kümadokogo. Israel ato kilonser Benjamin Netanyahu ya Israel kin asoshi sepai nung taküm ajak bendanga agüja tenzükba senso tajung ka lir. Pa tedi Yonatan Netanyahu ya July 4, 1976 küm Uganda nung Idi Amin’er kiralongrartemi Israel nunger tayimtsü anüng tom nung rakzüka bener orr Entebbe tayimtsü anendak Israel nunger noklang dak tali pua yur amokmerenba kümzüki aortem rongnung commander liasü aser parnok rongnung pa dang kiralongrartemi khaset. Iba lendong atalokba jagi balaka Benjamin Netanyahu mulungjung nung par lima tenzüktsü asoshi tarongba ka ait aser pa taküm Israel lima asoshi bendanga agütsütsü mulungtetter yimten nung shilem agitsü tenzük. Iba ama nisung kati yimsü asüba mapang India ato kilonser Narendra Modi ama kati Israel semdanga kin ana tsüngda tesensaktep akangshia yangluba jagi Israel dangbo India-ang tajangzük tuluba angutsü. Ali nung dang masü saka anüngdaka tuagi dena kin ana telongjem nung mapa inyaktsü asoshi Narendra Modi o Netanyahu na tsüngda onük benoka jembiogo. Iba jagia Indiai dang masü saka Israel-ia India den tsendaktep tajung yunüba mapa agi sayur, kechiyong Israel-i iba ama maparenji alima kin ajak denbo melemsateper.