India o Myanmar na tsüngda atsü atsüdangba anema nokdaker

Dimapur, Jan, 04 (TYO) : India o Myanmar (Burma) na tsüngda atsü atsütsü tenzükba mapa agi artsülen alir Naga nunger kasa kin aser kasa kinunger adianu majuruteptettsüsa piladaktsütsüsa mapang ka agi tonga arudagi.
Tang ya India aser Myanmar artsülen Khiamniungan nunger lushi nung kin ana tangatettep nung atsü atsüdangtsü mapa tenzükdagi aser iba jagi Khiamniungan nunger teti asoshi alima balala nung lemdanger alitsüsa akümtsü. India tsütsü Nagaland kübok Khiamniungan nunger yim noklang majung lir saka Myanmar tsütsülenbo Khiamniungan nunger yim 160 shi lir .
Ano, tebilemdangtsü kaji India tsütsü Nagaland kübok Pangsha nunger li acre 3500 shi Myanmar kübok lir aser parnok yangji dang aluyima taküm alir. Ajisüaka, India o Myanmar na tsüngda atsü atsüdanga dokra, iba luji Myanmar kübok asütsü, anungji Pangsha nungertem li Myanmar nunger nem agütsür akümtsü ta New Pangsha Village council mendenbuba Wb.P.Shingaya-i metetdaktsü.
Iba ama kasa kin aser adianutem alima balala nung alitsüsa lemdangtsütsü atongba sentong ya kanga sashia aitsür ta paisa metetdaktsü.
“Alemli nungi onok li nung onok senmangertem lia aru, Khiamniungan nunger li ya bendanger kari agütsüba li masü saka tetsü tebou nungi amanga aruba senmang lir aser India o Myanmar nati tapi agi arr yoka lemdangtsüyonga onok tsüngda kodanga raraa maru. Ajisüaka, tanübo India o Myanmar na tangatettep nung azüngba arlong züngya 139 nungi 146 tashi nung alir Khiamniungan nungertem alima balala küma lemdanger lidaktsütsü atonger,” ta New Pangsha Village Council mendenbubaisa jashia metetdaktsü.
” India aser Myanmar nati lisopur meyong rongsen aser parnok külemi putepa aliba tensa tia ajak raksaja telemsa adokdaktsütsü inyakba mapa ngua nüktsü ayimer aser iba ama telemsa adokdaktsüba mapa kanga sashia aitsür,” ta paisa metetdaktsü.
Iba dakji alaka ano tang International Trade Center nung ali atuba mapa inyakba agi tzü pipe ajak raksatsüogo aser kecha tapuyu mali süngdonglidong lensüktsüba agi takoksa tulu ngudagi ta New Pangsha yimten yimsüsüria India government nem metetdaktsüogo.
India o Myanmar na tsüngda ar long ya 1970-71 küm ali kiburtem dang tasüngdanga masüngdangi dang azüng. Ajisüaka, India tsütsü Pangsha aser Myanmar tsütsü Pounyiu yim na tsüngda kecha tenokdangba melii sademsadema lia aru aser mangatettepa kecha mali, anungji parnok tsüngda artsü yoktsü nüngdak madoker ta paisa metetdaktsü.
” Onok küm aika India kübok India nunger ama lia aruogo, joko onok ya nür chirtem lir, ajisüaka tang artsü atsüdangba mapa yagibo onoki yima aliba lu tangar kin keti aotsü, anungji Indiai aji shisa kaa bilemdangtsüla,” ta P.Shingnyai metedaktsü.
India o Myanmar na tsüngda teti asoshi atsü atsüdangba ajanga Naga nunger kasa kin alima balala nung lemdanger alitsüsa akümtsü asünungji, iba mapa ya tenzükba ngua Khiamniungam nungertemi longkak aita taitsüba metetdaktsüogo.