India o SA series dang ‘Gandhi-Mandela’ Series ta ajatsü: Dalmiya

New Delhi, August 31 (Agencies): India aser South Africa cricket telok na tsüngda asayaba Test series dang ‘The Mahatma Gandhi-Nelson Mandela Series’ ajatsü asoshi BCCI aser Cricket South Africa (CSA) nati renemba osang ka BCCI Tir, Jagmohan Dalmiya-i tanü Hombar nü metetdaktsüogo.
“India o South Africa na tsüngda asayaba Test series-ji Mahatma Gandhi aser Nelson Mandela na nüngtem nung renemba ‘Freedom Trophy’ agizüktsü atema asayatsü renemogo kechiyong linük anaprongla indang nüchiso angutsü asoshi timtem toushi jenti ajuruba otsü sako lir,” ta pai ashi.
“Gandhi o Mandela nati meraratsü aser amalitep malitsüren par tongpang oset kümdaktsür India o S Africa na nem yimjung tasa ajanga nüchiso bener arutsü aser iba yongji Test series indang takok marokji tena nüngtem nung renemogo,” ta pai shisem.
“Gandhi aser Mandela na ama alitsüji India aser S Africa nüburtem ajunga indang arok khuret lir,” ta CSA Tir, Chris Nenzani-ia metetdaktsü.