India Open 2017: Sameer Quarter-i iogo

New Delhi, March 30 (Agencies): Sameer Verma maneni tajungba küma asaya arudar; pai India Open Super Series nung pa dang nungi temaba jenjang nung aliba Hong Kong nunger asayar Hun Yu koka quarter-final-i iogo, aser iba ajanga India nunger tebur asayar rongnung iba asayamung takok marok abentsü asoshi pa dak dang timla lir.
Brehostibarnü asaya nung Hong Kong Open finalist, Sameer-i minute 40 nung 21-17 21-15 agi Hun Yu madak takok ngua liasü.
Dhar nungi arishi küm 22 tain asayar shibai January ita Syed Modi Internationals nung mezüngbuba Grand Prix Gold event koka liasü, pa taruba asaya Denmark nunger Anders Antonsen mesüra Germany nunger Marc Zwiebler den asayatsü.
Tanga asaya ka nung Rio Olympics bronze medallist Viktor Axelsen-i India nunger asayar Srikanth minute 25 nung 21-7 21-12 agi koka liasü.
Maneni tebur asaya nung B Sai Praneeth-i Chinese Taipei nunger Chou Tien Chen makok. Chou Tien-i minute 36 agia 14-21 16-21 agi Praneeth madak takok ngua liasü.
Tarep asaya nung Shruti Mundada aser Anoushka Parikh nati third seeded Japanese nunger asayar Naoko Fukuman aser Kurumi Yonao na mekoki asayamung nungi toguogo.
Syed Modi asayamung nung takok angur Pranaav Jerry Chopra aser N Sikki Reddy na Russia nunger tarep temeyoktep asayar Evgenij Dremin aser Evgenia Dimova na ket nung 18-21 19-21 agi tsükogo.