India-Pak arrtsülen BSF-i nisung 4 kahset

Amritsar, February 07 (Agencies): Deobar anepdang Pakistan den International arrtsülen Border Security Force (BSF) sepaitemi Pakistan nunger nisung ana densema ozüng alema mozü shibelener nisung pezü kahsetogo.
Nisung kahsetba tesem nungjagi BSF-i heroin seret 10, pistol asem, fence cutter ana, Pakistan nunger sen ishika aser Pakistan nunger SIM card kar nguogo.
Iba tatalokba tesemji Punjab, Ferozpur sector nung BSF border outpost anasa liasü, ta ketdangser kati ashi.
Osang ajanga ashiba agi, ozüng anema shibelenertemji International arrtsü adener India telungi aitba mapang BSF patrolling party kati parnok angu. Iba mapang nungjisa heroin agizüktsü atema iba tesem jagi arur India nunger ozüng alema shibelenertemji-a arrtsü anasaji tonger liasü.
Ozüng alema shibelenertem jagi BSF dak mezüng injang kalokja telok ana tsüngda kahtepdang ozüng alema shibelener India nunger ana aser Pakistan nunger ana kahset, ta kasa osang ajanga ashi.