India-Pak arrtsülen kiralongrartem amakba sülen sorkari party ajak senden ayong

New Delhi, September 29 (Agencies): Bodhbar ayaterm nung India sepaitemi  India-Pakistan arrtsülen kiralongrartem aser Pakistansepaitem aika tepsetba sülen Brihostibarnü sorkari party ajak senden ka ayonga agiogo.

Intelligence osang ajanga, kiralongrartem India telungi aiter kiralongratsü atema renema lir ta osang angazükba nung ajemdaker army temi iba mera agi.

Osang ka ajanga ashiba agi, army temi iba operation nung kiralongrar 35-40 shi aser Pakistan army 9 tepsetogo.

Kasa osang ajanga ashiba agi, iba operation ji Bodhbar ayaterm nung tenzük aser Brihostibar anepdang 4:30 ako meta tembanga liasü.

Delhi nung osangbenertem den jembidang Congress Party otongdar, Raj Babbar-i, “Onok army tem den külemi lir, kechiyong parnoki iba tensa junga meteta lir, aser parnoki tayongzükba ajak ajangshia arur. Party ajak senden tembangba sülen onoki jembitsü. Sorkari tanü nikongdang 4:00 ako nung party ajak senden ayonga lir,” ta ashi.

Ano tanga osang ka nung, army temi Pakistan arrtsülen  kiralongrartem amaktsü atema sorkari mera agibaji Congress aser AAP napronglai pusema jembiogo.

Congress-i, linüki arrtsülen kiralongraba anema raraba nung party-i sorkar nungiter, ta metetdaktsü.

Congress bangdak lenirtem senden ka amenba sülen Congress Tir, Sonia Gandhi-i sangdong ka ajanga, “Asen linük security kümzüka ayutsü aser arrtsülen kiralongraba anema tanü sorkari inyakba mapaji party-i pusemer. Iba mera agia inyakba ajanga linüki bendanger nokdangba aser asen security sepaitem aser asen nüburtem amakba nokdangtsü atema inyakba sayur,” ta metetdaktsü.

Kasa sangdong nung Sonia-i, “Arrtsülen adena aiter India anema kiralongraba nung Pakistan-i par khuret angatettsüla. Pakistan-i kiralongrar anema inyaktsü aser par litsüji India anema kiralongratsü atema mamshitsü imlar,” ta shia lir.

India army temi takok ngua kiralongrartem amakba atema Congress-i army nema tenüngsang agütsüogo.

Ano külen Aam Aadmi Party (AAP)-ia army temi LoC nung kiralongrartem teseptem amakba adena tenüngsang agütsüogo.

Brihostibarnü AAP tongti lenir aser Delhi Chief Minister, Arvind Kejriwal-i, linük nübur ajak armed forces den lir, ta ashi.

Ajungbena kiralongrartem amakba osangji tanü DGMO Lt Gen Ranbir Singh-i metetdakja liasü.

September 18 nü Pakistan nung amenoka aliba kiralongrar telok JeM-i Kashmir, Uri nung army camp ka amakba sülen anogo 11 lir yasüng ayaterm nung Indian army temi kiralongrartem makogo.

Ano tanga osang ka nung tanü Union Home Minister, Rajnath Signh-i state pezü nungi chief minister tem aser opposition lenirtem danga army temi kiralongrartem amakba osang metetdaktsü.

Home Minister Rajnath Singh-i West Bengal, Odisha, Punjab aser Bihar chief minister tem, taoba mapang Ato kilonser, H D Deve Gowda, Congress lenir Ghulam Nabi Azad, CPI-M tongti, Sitaram Yechury nunger dang kiralongrartem amakba osang metetdaktsü, ta ketdangsertem osang ka ajanga ashi.