India-Pak Foreign Secy level senden thinena atar: MEA

New Delhi, January 14 (Agencies): Brihostibar nü Ministry of External Affairs (MEA) otongdar, Vikas Swarup-i, India-Pakistan na külem tangatettep nung India-Pak foreign secretary-level senden tang atemabo thinena atar, ta ashi.

Pakistan nung osangkakettem ajanga, Pathankot amakba dak sentakba nung Maulana Masood Azhar puogo ta osang prokba dak sentakba nung Swarup-i, Jaish-e-Mohammad (JeM) tongti Maulana apuba osang pa nem metetdakja mali, ta ashi.

“Masood Azhar apuba osang onok nem metetdakja mali, ajisüaka Pathankot amakba dak sentakba nung Pakistan sorkari mera agia bushisüngdangbaji onoki pelaa agizüker,” ta Swarup-isa ashi.

“Pathankot amakba dak sentakba nung SIT-i India semdangtsü onoki atadar,” ta MEA otongdar isa shisem.

“Linük ana tangatettep nung India-Pak foreign secretary-level senden anogo lemtetshitsü,” ta Swarup-i ashi.

MEA ajanga ashiba agi, Pathankot amakba bushis¤ngdangba maparen nung linük anaprong nungi NSA tongtepratepdar.

Ano tanga osang ka nung, tanep Pakistan foreign office otongdar Qazi Khalilullah-i, Foreign secretary level senden atema Indian Foreign Secretary S Jaishankar-i linük semdangtsü aliba thinener ta metetdakja liasü.

Paisa, January 15 nü Pakistan aser India na tsüngda Foreign Secretary-level senden amentsü aliba anogo melenshitsü, ta ashi.

“Asüng India aser India na Foreign Secretary-level senden makatsü aser anogo atsülangogo. Foreign Secretary-level senden akatsü anogo lemtettsü atema India aser Pakistan sorkar na tongtepratepdar,” ta Pakistan Foreign Office otongdar Qazi-i tanü metetdaktsü.

Pathankot amakba dak sentakba nung Jaish-e-Mohammad tongti lenir, Maulana Masood Azhar pua lir ta osang prokba dak sentakba nung Qazi-i, “Pa apuba osangji ni angashia mali. Senden akatsü anogo atema linük anaprong lemtepdar. Kiralongrabaji ajak atema tsükchir ta onoki aiben jembia aruogo. Iba ya anentsütsü atema asenok ajak senteper inyaktsüla,” ta Khalilullah-isa shiogo.