India-Pak ken o nung tasembuba telok shilem mali: BJP

Jammu, Sept 02 (Agencies): Tanü BJP-i, Simla Tezüngzüktep nung ajemdaker India aser Pakistan linük na tsüngda ken o jembiba nung Hurriyat Conference densema tasembuba telok ka shilem mali, ta ashi.

“India aser Pakistan na tsüngda ken o jembiba nung tasembuba telok ka tiyongtsüi aittsü mesüra angatetteptsü shilem mali,” ta tanü Jammu nung state BJP tongti otongdar Sunil Sethi-i osangbenertem dang ashi.

“Shimla Tezüngzüktep nung ken oji linük ana tsüngda dang jembitettsü aser India adener mesüra telung nung nija kari mesüra tentet kari shilem agitsüji agizüktetla masü. Iba ama ken o senden nung Hurriyat Conference mesüra tanga Separatist tentettem shilem kecha mali,” ta Sethi-i ashi.

Yashi Opposition National Conference-i, Hurriyat Conference-i raraba oset yuogo aser ken o jembitsü atema melunga lir, ta shiogo. “Pakistan den ken o jembiba nung parnoka (Hurriyat Conference) anioksemtsü atema New Delhi asoshi iba kuli ya teperi südaktsütsüla,” ta National Conference-i ashi.

Sethi-isa, arrtsülen mangatettep ken o latettsü atema India aser Pakistan-i ken o jembitettsü, iba den külemi ceasefire temzüng alema inyakba aser Pakistan-i kiralongrartem yariba mesüra India nung Separatists yariba ken o jembitettsü akok, ta ashi.

Linük ana tsüngda ken o jembiba nung Pakistan-i Hurriyat densemdaktsütsü merangbaji magizüktettsü, ta paisa ashi.