India-Pak Nuclear rara

Kibong nung adianuna tsükchitepa aruba medem India aser Pakistan na ya adianu linük amai lir, saka tanen makai tsükchitepa arur. 2014 küm May ita nung Narendra Modi-i Pakistan linük den temba ayimtsü nükjidong nung mera agia Ato kilonser tenangzükba sentong nung adentsü atema Pakistan Ato kilonser, Nawaz Sharif jaoka liasü, iba sülena Modi-i ajungbena Lahore semdangogo. Tesüiba küm ishika Pakistan-India arrtsülen Pakistan-i ceasefire ozüng alema inyakba osangtem anogoshia amai zünga arur aser Kashmir onük nung linük ana tsüngda taliba tsükchitepa arudar. Ajioda Pakistan nung amenoka aliba kiralongrartemi yaküm Pathankot amakba aser tawa Jammu & Kashmir, Uri nung army camp ka amakdang India nunger sepai 18 tepsetba sülen linük ana tsüngda tesentaktep kanga tamajungba kümogo. Iba tatalokba sülen Modi-i linük dang ‘sepaitem taküm bendanga agüja asübaji amajokbo masütsü, aibelenertem nem temerenshi magütsüiang malitsü’ ta azüngashi. Modi-isa alima linüktem dang Pakistan ya kiralongrar linük ka ta sangdonga iba linük sentoktsüla ta tayongzükba agütsü; iba atema telangzüba tajung agütsür amato taküm November ita Pakistan yimtiba, Islamabad nung ayongba SAARC senden nung madentsü India-i telemtetba agiba sülen Bhutan, Bangladesh, Afghanistan, Sri Lanka aser Maldives linüktemia iba senden nung madentsü ta metetdaktsüogo. Modi-i nangzükba inyaker amato Bodhbar ayaterm nungi tenzüka India sepaitemi Pakistan arrtsülen kiralongrar 38 den Pakistan sepai kar tepsetogo. Iba sülen tang India o Pakistan linük na kati ka amokmerentepa linük ana tsüngda rara tulu adoktsüsa tensa ka ajuruogo. Linük ana tsüngda 1965 küm aser 1971 küm rara tulu adoka liasü. Tang linük kati ka sashia amokmerentepa linük kati danga atsüanem mesüra linük ana tsüngda tasembuba rara tulu adoktsü südi ta aikati bilemer. Tasembuba rara adoka linük anapronglai nuclear amshira nisung million aika asütsü. India aser Pakistan nati senteper nuclear warhead 100 shi amshia rarara nisung million 21 shi asütsü, ozone layer tesadang ka shi raksatsü aser alima tsüngsang mopung melenshitsü, ta asadangtetogo. BJP MP kati nuclear amshia Pakistan amaktsü sorkar ajungshir aser Pakistan defence minister-ia India rangben samatsütsü amokmerener. BJP MP Subramanian Swamy-i, Pakistan-i nuclear amshia India nunger million ka tepsetra India-i Pakistan samatsütsü, ta jembi aser ibaji langzüka Pakistan defence minister, Khawaja M Asif-i, ‘Pakistan security amokmerenra onoki kecha marendaki nuclear amshitsü’ ta amokmerenogo. Linük ana sasep nung asadanger dangashi, nuclear amshibaji ajanga kidanger linüktema kongshitsü aser tsüngsang mopung nung temelenshi tulu adoka alima nung nisung billion 2 shii ayawara tia ajurutsü ta asadangteter. Atomic Scientists osang ajanga ashiba agi, tang Pakistan ket nung nuclear warheads 110-130 shi lir aser India ket nunga 110-120 shi lir. Pakistan aser India napronglai Kashmir ya parnok meyong lir ta jembir, saka tesem balala yimsü südar. 1947 küm British nunger yimsüsüba nungi nüchiso anguba sülen Kashmir mechi nung linük ana rara asemben tashi adokogo. India tembar linük, US aser Pakistan tembar linük, China natia linük ana dang Kashmir mangatettep ken o yabo linük ana tsüngda yimjung nung ken o jembia bentettsüla ta mapang aben ajungshia arur. Pakistan ya kiralongrartem jenoka sademsadema lidaktsüba linük ka, ta alimai sentokdang Pakistan-i tama India anema nuclear rara ayongra ibajibo parnok tsütsülen nungi kanga tamashi mapa ka asütsü, kechiyong tanga linüktemia senteper par lima meshimeshia samatsütsü. Tashi tulu aliba linüktemi anir alima linüktemi joko alima nung rara tulu agi laktetogo, ibayongji ajaki alima yimjung atema ajaki inyaker, ajisüaka linük kati danga atsüanem mesüi tashi sayutepa nuclear amshira linük anaprong nung nisung jenti asütsü, linük jenjang tesüleni talangka atsüngzüka alutsü, tashitak jenti poktettsü, tanur sopetsora asotsü aser alima tzümopung menenba ajanga timtem jenti ajurutsü.