India-Pak rara ajanga nuclear amshitsüsa akumtsü: US General

New Delhi/Washington, March 10 (Agencies): India-Pakistan rara ajanga nuclear amshitsüsa akumtsüa akok, kechiyong Pakistan nung amenoka aliba kiralongrartemi amakba atema India-i ibaji meyiptsür, ta US General kati metetdaktsü.
Senate Armed Services Committee den jembidang US Central Command mesüra CENTCOM nung Commander, Gen Joseph Votel-i, India aser Pakistan na tsüngda maneni tensa mejungi lir, ta ashi.
“Pakistan nung amenoka aliba telungpurtem anema sashia meinyaktetba ajanga India-i tebilemtsü kanga akar, iba den külemi taküm küm tetenzüklen India litsü nung kiralongrartemi amakba atema mitkartemia meyiptsüogo,” ta yashi Votel-i America nung Senator tem dang ashi.
“Iba dak alia India-i yimjak nung alima linüktemi Pakistan sendoktsü atema inyakba ajanga linük ana tsüngda tesendaktep yanglutsü lenmang nung tetsüdaktsü agütsür. Anungji India aser Pakistan tsüngda rara ajanga nuclear rara oseta amshitsüsa akumtsüa akok,” ta Votel-i ashi.