India-Pakistan rara ajanga lendong tulu ataloktsü: Mehbooba Mufti

Srinagar, September 29 (Agencies): Brihostibarnü Jammu & Kashmir Chief Minister, Mehbooba Mufti-i, India aser Pakistan sepaitem tsüngda rara adokra lendong tulu ataloktsü, ta ashi.

“Tensa süngjemtsü atema rongdak süa mera kar magira India aser Pakistan tsüngda rara ajanga state nung lendong tulu ataloktsü.New Delhi aser Islamabad napronglai tongteprateptsü atema lenmang lapoktsüla, kechiyong tang arrtsülen tensa tamajungba akumba ajanga lendong tulu adoktsü,” ta lai ashi.

Yasüng ayaterm nung Indian army temi Pakistan arrtsülen kiralongrartem amakdang kiralongrar aser Pakistan sepai aika tepsetba sülen Mehbooba-i iba o jembiogo.

“Jammu & Kashmir nüburtem atema, arrtsülen aser mainland nung tensa tajungba kümdar, aser yamaji linük ana tsüngda yimtenren lenirtemia kasa tanela nung inyaktsü ta ni  amanger,” ta lai ashi.

“Adianu ana India aser Pakistan na tsükchitepa lir, saka maneni tsükchitepba ajanga tamajunga ataloktsü,” ta laisa ashi.

Mehbooba-isa, rara tulu ana adoker sülena India aser Pakistan nati ken o jembia liasü, aser iba lenmang dak alaka tanga lenmang mali, anungji linük anati mangatettep aliba onüktem bentettsü atema ken o jembitsüla, ta ashi.