India-Pakistan tensa mazüokteti mekümdaktsüner: Mark Toner

Washington/New Delhi, September 09 (Agencies): India aser Pakistan na dang tensa tamajungba makümtsü atema ken o jembitsüla, ta shia Brihostibarnü US-i, linük ana tesendakatep tamajungba küma tatalokba melidaktsüner, ta ashi.
South Asia nung kidanger linük ana tsüngda tesentaktep mejungi akumba mapang ka nung US State Department-i iba o jembiogo.
Yashi India Ato kilonser, Narendra Modi-i, South Asia nung linük kati (Pakistan) kiralongra proker ta aija liasü. G20 senden densema alima sabang balala aika nung Modi-i kiralongraba onük nung Pakisan linük aija arudar.
India aser Pakistan na tsüngda US-i shilem agitsüla asü, ta asüngdangba langzüdang US State Department otongdar, Mark Toner-i, “India den mesüra Pak den jembiba mapang ajak nung onoki linük ana tsüngda tesentaktep tajungba akumtsü atema ajungshir,” ta ashi.
Pakistan aser India tsüngda linük tesendaktep tamajungba akumba dak sentakba nung US ketdangser Toner-i, “Tesem nung tensa meraksatsü atema parnoki inyaktsüla aser ken o jembitsüla,” ta ashi.
“Iba atemaji onoki teti ajungshir. Onoki tensa tamajungba mekümdaktsüner, mazüoktettsüsa küma tatalokba melidaktsüner,” ta ashi.
July ita nung India sepaitemi Hizbul telungpur commander, Burhan Wani tepsetba sülen Pakistan-i Wani ji taküm bendanga agütsür ka ama tushiba sülen nungi India aser Pakistan na tsüngda kanga aitsütepa arudar.