India ‘realty company’-i Africa nung sen $50 mn agi ki yanglutsü

Accra, January 29 (Agencies): India realty company ‘Swami India International’-i Africa nung aliba Gambia, Senegal aser Ghana linüktem nung nüburtemi atutsüsa talitsü ki sütsütsü atema sen dollar million 50 dak tema entoktsü, ta company project manager Tarun K. Singh-i metetdaktsüogo.
“Yaküm African Development Bank (AfDB)-i ashiba agi Africa-a noklang nung 3.4 shilem renloka kümdar, aji oda süaka tia makai libaliro den putepa nüburtemi atutsüsa talitsü ki mesütsütetter,” ta Singh-i IANS osangbenertem dang ashi.
“Anungji Swami India Group-i Africa sorkartemi magütsütetba agütsütsü,” ta pai shisem.
Pai, ozü company-i 2004 küm mezüngsüa ‘accommodation market’ nung ajemok aser Gambia nung sen dollar 500,000 entoka ki aser ali aliba project ka tenzük, ta ashi.
“Gambia nung onoki inyakbaji tila kadang lir kechiba süra tang tashi nübur aika talitsü ki makai lir,” ta pai ashi.
“Africa linüktem nung nüburi atutsüsa ki mali, aji dang masü saka rongsenkettsüng tsütsüa tebilemtsü tulu lir,” ta AfDB-i ashi.
Item tebilemtsü ngua Swami company-i tendanga iba project ya tenzükerba lir aser iba maparen ya Africa linük sorkartem yarir mesüka lir koba ajanga yangji aliba nüburtem tebilemtsü aika pungtoktsütsü, ta Tarun Singh-i ashi.
“Onok tasü mait malitsü. India nung aliba company tem dang Africa nung sen invest asütsü ajungshitsü kechiba süra Africa nung teinyaktsü aika lir aser tang item terenlok mapa inyaktsü mapang tetemsü lir,” ta pai shisem.