India-SE Asia sentakteptsü nüngdakba indang jembiogo

Sept. 22 nü Tripura yimtiba, Agartala nung 3buba Northeast Connectivity Summit nung Nagaland CM, T R Zeliang adenba noksa nung angur. Kasa noksa nung Tripura CM, Manik Sarkar-a angur.

Dimapur, Sept. 22 (TYO): Nagaland Chief Minister, TR Zeliang-i arrtsülen aser southeast Asia linüktem den shishilembaba jenjang tajungba akumtsü atema Northeast India nung railway aser gari lenmang connectivity ji kanga tongtibang, ta shiogo ta Media Cell Chief Minister’s Office Nagaland-i sangdong ka ajanga metetdaktsü.
Infrastructure nung ano teinyaktsü jenti lir ta shia Zeliang-i, arrtsülen shishilembaba  jenjang tajungba kümnüra tesem nung connectivity tajungtiba akumtsüla, mezüngbuba nung India mainland aser Southeast Asia linüktem den NE sentakteptsü atema highways aser railways jenjang tajungba akumtsüla, ta ashi.
Kodang iba jenjangji tongtetdir International shishilembaba aser terenlok tsütsü iba tesem ya tiyongtsü ka akumsü, ta pai ashi.
Tanep Tripura yimtiba, Agartala nung Northeast Connectivity Summit nung “Connect Northeast, 2016” omen nung jembidang Zeliang-i item o ya jembia liasü.
India sorkar indang act East Policy nükjidong nung iba ya adentsüla, ta paisa shisem.
Iba summit ya Federation of Indian Chamber of Commerce & Industry-i ayongzük aser Tripura sorkar, DONER Ministry aser NEC-i nungita akar.
CM, Zeliang-isa, “India aser Southeast Asia linüktem na tsüngda lenmang aser rail ajanga sentakteptsü tajungtibaji Kohima nungi Imphal ajanga Moreh tashi asütsüla,” ta ashi.
Paisa, WWII mapang Kohima tongbangji iba lenmang atema raraa liasü, iba lenmang ajanga Japan nunger sepaitemi India lendeni otetla, ta ashi.
Zeliang-isa, East-West corridor tang koba Assam nung aiba Silchar nung tembanga lir, iba ya Doboka nungi Kohima aser Imphal ajanga Moreh tashi asütsüla, ta mepishiba den külemi tang highway kati Moreh aser Kuala Lampur sentaktepa lir, ta paisa shisem.
Iba den kasa medemtepa railway-a alitsüla ta shia pai, India sorkari Diphu (Dhansari) nungi Karong (Manipur) tashi broad gauge line reprangshitsüla, iba atema 1998 küm Nitish Kumar-i lung azüngtsü saka yimtenren dak sentakba kuli kar ajanga iba mapa sentoka toktsü, ta ashi. Southeast Asia linüktem den sentakteptsü atema iba lenmang ya kilometer 125 agi tatsüba asütsü, ta paisa ashi.
“Seamless Border Trade with Bangladesh and Southeast Asia” onük dak sentakba nung jembidang pai, Pakistan aser Bangadesh den arrtsülen atsü atsüba ama Northeast atemabo masütsü, kechiyong Nagaland atemabo International arrtsüji ayong ka mesüra tanga temaitsütem ajanga melateter, saka watershed principles nung ajemdaker lateter, ta ashi.
Iba dak sentakba nung paisa, Mon District kübok Longwa yim nung Angh kiji tesadang ka India nung aser tesadang kabo Myanmar nung lir, ta ashi.
“Atangji, onoki merang atsü menüngdaker saka arrtsü aser arrtsülen lenmang nüngdaker, koba ajanga shishilembaba ajungkettsü aser terenlok alitsü,” ta pai ashi.
Paisa, lenmang aser communication maliba ajanga item tesemji telungpurtem atsüktsü atema tetemjen tesem akumer, ta ashi.
Iba Summit nung Bangladesh, Bhutan aser Northeast States ajak nungi tejaokertem denogo.
4buba Summit ji 2017 küm September 21-23 anogotem nung Nagaland nung ayonga akatsü, aser iba atema Nagaland Chief Minister, TR Zelang-i delegates ajak jaokogo.