India sepai tasümang ka anüka rangsatsü

Kurukshetra/Jammu, October 29 (Agencies): Hokolbar aonung Kashmir kübok Line of Control  (LoC) nung kiralongrartemi India nunger army ka tepsetba sülen tasümangji anüka rangsatsü.
Yasüng Pakistan nunger Army temi injang yoka atadang  kiralongrartem LoC adena aiter Kupwara district kübok Macchil sector nung arishi küm 30 sepai, Mandeep Singh tepsetba sülen tasümangji aika küma rangsatsü.
Mandeep Singh’er kinüngertemi, Pakistan-i kiralongrartem jenokdaktsüba atema parnok dang tansütsü ka sayutsüla ta ashi. Asür adianu, Sandeep Singh-ibo, tekolak ka melen ozü kinungertemi Pakistan nunger tekolak 10 aginer, ta takhangba agütsü.
Mandeep tebu-i, “Ibaji pa teinyaktsü mapa ka liasü, aser pai aji inyakogo. Pai pa taküm bendanga agütsüogo. Asenoki Pakistan nem tapet meyiptsütsüla,” ta ashi.
Asür kinüngtsü Prerna-i, “Joko kibong shingaia iba ama mangyim tia majurutsü atema Pakistan dang tansütsü ka sayutsüla,” ta ashi.
Lai ashiba agi, ita trok jakdang Mandeep sodi arua liasü aser ano Diwali sodi-a arutsü liasü saka Machil sector nung tang arrtsü tensa ajanga pa nem sodi magütsü.
Union Minister, Jitendra Singh-i, tasümang rangsatsübaji kangasa taochi maketba mapa lir, iba dak alia tamajungba malitsü, ta aitsüogo.