India Skills Competition Nagaland 2018 tembangogo

Monupii/May 19, 2018 nü Kohima nung  India Skills Competition Nagaland 2018 tembangba sentong nung Commissioner & Secretary, L&E, SD&E, Anenla T. Ao-i Cooking Skill nung takok angur, Sentienla Kichu nem sempet agutsüba mapang tangokba noksa nung angur. 

Kohima, May/Monupii 20 (TYO): ‘India skills competition Nagaland 2018’ sentong nung kaketshirtemi cooking aser patisserie/confectionary nung anogo pezünü tashi sempet sayaa aruba süslen Monupii 19, 2018 nü Khachaki, Kohima nung tembangogo.
Anogo pezünü India skill competitions ya Directorate of Employment, Skill development & Entrepreneurship Nagaland nati event partner Synergy groups enterprise nung senteper ayongzüka liasü.
India Skills Competition, Nagaland 2018 atema senotsüji National Skill Development Corporation-i agutsü.
Iba sentong nung jembidang Commissioner & Secretary, L&E, SD&E, Anenla T .Ao-i sentong ayongzükertemi iba ama sentong ayongzüka takok ngua katetba atema pelaba alemsatep.
Laisa, infrastructure junga maliba ajanga Nagaland-i tanga state tem ama takok menguteter, ta ashi.
Laisa, Nagaland sorkari iem ama sentong aika ayongzüktsüla aser lanurtem nem training agütsütsüla, ta ashi.
Lai shilem agirtem dang iba ama maongka agitsü aser pei mapa akumtsü ajungshia liasü.
Kasa sentong nung North East Region NSDC Analyst, Zimik-i, ” North east state tem nung lanurtem dak sempet tajung lir aser item ama sentong ajanga parnok sempet sayatsü atema sabang agütsür, ta ashi.
Paisa, iba ama tetoktepba ya tang tetenzüker ka dang, ano takok angurtemi regional, national aser alima jenjang tajung nung parnok sempet sayutettsü, ta ashi.
NSDC-i maneni senotsü agi aser technical tsütsü item ama sentong ayongzükba nung yaritsü, ta apisa ametetdaktsü.
Skills competition cooking & Patisserie/Confectionery nung Cooking skill nung takokerji Sentienla Kichu liasü, 1st Runner up aser 2nd Runner up ji Begum Apchana aser Mengukhrielie na liasü. Patisserie/Confectionery skill nung takokerji Vikhonuo Hibo, 1st Runner up aser 2nd Runner ji Renphamo Ezung aser Keneiseinuo Kere na liasü.
Takok angurtemi senpet sen 25000, 15000 aser 10000 den certificates anguba den külemi parnok nem anogo ananü Exotic School of Cooking nung training agutsütsü. Iba dak alia shilem agir ajak nem sen meyirjang anana agüja liasü.
India Skills nung takok anguertemi India tenüng nung 2019 küm Kazan, Russia 2019 nung shilem agitsü aser Aami (June) 2018 nüng Bhubaneswar nung National jenjang nung shilem agitsü.
Item tetoktepba nung tenedangertemji Rovi Chasie, Aien Jamir, Alemjungla Jamir, Joel Basumatari aser Chenti Phom nunger liasü.
Iba sentong ya Joint Secretary L&E, SD&E Dept & Convenor, Organizing Committee leniba nung agi aser Commissioner &Secretary, L&E, SD&E, Dept Anenla T.Sato-i sempet lema agutsü.
Sentong temabgna Director Employment, Skill Development &Entrepreneurship Y. Vandamshan Lotha-i tepela anküp o jembia liasü.