India sorkar aser NNPGs Working Committee tsüngda olemtep tenzükogo

Dimapur, September 27 (TYO): Indo-Naga yimten tebilemtsü angatetteptsü atema India sorkar aser Naga National Political Groups (NNPG) trok indang Working Committee (WC) tsüngda yimten olemtep tenzükogo.
Mezüngbuba sendenji New Delhi nung amen aser idangji Indo-Naga peace talks atema interlocutor R N Ravi-i Working Committee Convener, N Kitovi Zhimomi-i aniba züngsem 18 teshimtet telok den ajurutep.
Senden nung R N Ravi-i WC pela agizük aser küm 70 jungnüa mebentetteti aruba Naga yimten tebilemtsü angatetteptsü atema iba ya India sorkar aser Naga nunger atema otsüsütsü aketba mapang ka lir, ta pai ashi.
Iba onük angatetteptsü atema asenok kati ka akhümtsübutepa aser temulung lemtepa inyaktsüla. Asenoki olulu nung mamangtsüla saka chichiba angateta mapa inyaktsüla. Asenok tsüngda mangatetteptem liaka, India sorkar aser Naga nungertem ajungtsü atema bilema telemtetba ka agitsü atema inyakdi, ta RN Ravi-i Working Committee dang ashi.
Senden nung Working Committee Convener, N Kitovi Zhimomi-i India sorkari NNPGs jaokba atema pelaba metetdaktsü.
Prime Minister Narendra Modi-i Indo-Naga yimten tebilemtsü angatetteptsü ta nangzükba aser jangraba atema N Kitovi-isa pelaba shisem.
Maneni, R N Ravi-i Indo-Naga yimten tebilemtsü den sendaktepa alirtem ajak aden nungdang aser olemtepba agidang telemtetba agitettsü ta angatetba atema pelar, ta WC Convener-isa metetdaktsü.
Working Committee nung Co-Convener tem- V Nagi, Wangtin Naga, Zhopra Vero, Kiumukam Yimchunger aser Hozheto Chophy temia o jembidangt Prime Minister aser Interlocutor na dang pelaba metetdaktsü.
India sorkar aser Naga National Political Groups (NNPG) Working Committee tsüngda tanabuba olemtepji taruba ita (October) nung agitsü.
Asen putiotsü nung iba ama tongtipang mapang ka nung nübortemia sarasadem ajanga nungittsü mepishir ta Media Cell, Working Committee (WC), NNPGs-i sangdong ka nung metetdaktsü.