India sorkar aser NSCN(IM) dang Naga yimten telok ajak dendaktsütsü mepishir : NPF

Kohima, January 29 (TYO) : Naga nunger ajaki agizüktettsüsa telemtetba ka agitsü asoshi Naga yimten telok ajak dendaktsütsü atema India sorkar aser NSCN(IM)-i sentong ka atongang, ta Hokolbarnü Naga People’s Front (NPF)-i mepishia metetdaktsü.
Congress MLA 8 den JD(U) aser NCP nungi züngsem ka ka NPF nung adenba sülen mezüngbuba NPF Central Executive Council (CEC) senden alidang iba temepishiba metetdaktsü.
Indo-Naga yimten tebilemtsü asoshi ajaki agizüktetba aser akhümtsübutsüsa telemtetba ka agitsü atema NPF-i tenangzüba agiba nung masetshii noktaka lir aser yaküm August 3 nü NSCN(IM) aser India sorkar tsüngda frame work agreement pelashishia agizüker, ta NPF CEC-isa tanü metetdaktsü.
NPF CEC-isa Manipur state kübok tenemlen alirtem pusema yaritsü bangjemtep. Yaküm August 31 nü Manipur Legislative Assembly-i hill & tribal peoples’ anema bill asem benok aser bill asem anema NPF CEC-ia lungkak aittsü.
Manipur nung MLA kari bill asem magizüker ta sayua pei menden toktsü aser parnok rongnung NPF MLA tem dena lir. Parnok den külemi lir ta sayutsü atema NPF CEC-i India Tir dang bill tem magizüktsü atema mepishia metetdaktsü.
NPF CEC-isa Congress, JDU aser NCP MLA tem den parnok pusemertem ajak NPF nung adenba atema pelashishia agizük. Iba teloktep ajanga party sorkar tashi aittsü aser Naga Yimten tebilemtsü asoshi taginüba tongtettsü imlar, tanü senden nungsa metetdaktsü.
Yaküm April 30 nü NPF special General Convention alidang party züngsemtemi Chief Minister T R Zeliang aser Party President Dr Shurhozelie Liezietsu lenisüba kübok tamang akar ta nangzükba nungi masetshii lir aser maneni party sasep nung putepshiba aser telongjem atema inyaktsü ta NPF CEC-isa bangzünga renem.
Iba telemtetba anema nisung kari danga jembira mesüra mapa inyakra, disciplinary action alitsü ta NPF CEC-isa telemtetba agi.